PAMUN NING BUKAS
~ Ulyu 28, 2023
ing pota mebating ne--
likwan ne ing bukas
anting parati
ngeni
na.
ing napun linabas n e--
disnan ne ing nandin
mengaring ika
ala
na.
atu ning panalala--
tagan na ing tangab
a mibabaya
abu
na.
memun ne ing bukas--
anti yang salamin
tulas na ning lwa
tuknang
ka.
***
KABLAS
~ Ulyu 01, 2023
kabas ning kablas
ning milabas a patak ning uran
king bubungan ku
napun
kalabas ning napun
ngeni milabas ing tatak buran
panalala mu
ngeni
***
URAN KING MALELDO
~ Mayu 05, 2020
Kabang manaya king kauran
ala kung buring nanu mang gawan,
nung e mu manamdaman karing kule ning bulan.
Pinatak ing uran, mebawas ing lisangan.
Oneng kayari na mipawas na naman.
Alang akarapat, alang ayasaan
ding lilung penandit kakung bibilangan,
kabud gana-ganakan libu-libu kung denasan.
Tinulu ing uran, mebawas ing libangan.
Guryun ding kamalitan sati kepataran.
***
MUSANG MALYAP
~ Unyu 07, 2014
kitid ning malasukle bulan —
makagyu ne dagul bang arakap
ing mababo pusu
magdili-diling biga —
panggulut ding danupang talibatab
pakirakpan ing bengi
manimusyo ya'ing malasukle —
lalangut iro saresa
akdut king panggulut
maragul a simpan king baldugan —
yamuk king gising kulumbu
musang malyap
***
PASLU KING SALU
~ Mayu 24, 2022
E ku bisang mandatila pa
King metung a karinan
A kisnang panalalang
alang pamiyaliwa
Karing paslung mapurul
Dapot sasalaksak pilit
king salu kung mataram.
Papasamul da
ing kasalpantayanang kidta ra.
E na atanggap ning dungus ku ita.
Lula ku man, e ku bulag
Para e akit ing sala.
***
PATUKOLEDYUNG
~ Oktubri 24, 2021
bulaklak ikit ku--
king dalan a matas kabang pakuldas
sukal ku lub
napun kalingwan--
katutwang e mu na agyung ilingad
mitakid ku
***
URAN
~ Agostu 23, 2021
maglalang ka
karing e abilang-bilang
a gulis ning lugma
e naman pauli ning
e ku byasang mamilang
dapot parati kang mamiragli
balang payndalan ka
ay, wa pin--
mipapakde ku
at makasulat kung dalit
mengari kanini
makanyan man,
gagawan meng kulungan
ing kanakung pibale-bale
bina ka mung alang masabal
***
ABLI
~ Setyembri 10, 2020
lalam ning marurunut a bulan--
mamilang kang abli
ning kekang pamanganyaya
karin mu kabud manibatan--
lasun ning kama ndag mu
karing mikuyug matilus mung dila
kukusad na ing atab--
lulub alang kaluskus
mula ding kekang panimanman
libad-libad ya ing tamumu--
king karinan ning tatabwan
mengaring panalala mung e magigisan
migdalit na ya ing sisilim--
at memalbal ya ing luse duldul
agnan menagkas ya'ing manablad a alti
***
ALINO NING ALDO
~ Ulyu 14, 2017
alino ning aldo--
king lupa ning bigang uran
magpakarug king salu
ning malamarine sisilim
bulung na ning duldul--
magpangakling king panakit
ning napus a banwa
king luse panimanman
~Kawatasang Miyayaliwa Aske,
sinulat nang Miguel Serrano. anting ambag king Kapisik
***
Ing pamikudta karing kawatasan o nanu mang paralan ning Panyulat o Literature metung a gawi na na ning Watas o Poet at iti makasalaksak na king isip na at mekad king pusu na o pilubluban at king lakwas na king keyang diwa.
Metung iting paralan ning pamibulalag e mu karing panamdaman na dapot anti mu naman karing panamdaman da ring aliwang para nang tau at nung wari papasyag na iti uling ya ing ating kegiwan daptan na iti anting kampung ning Panyulat. Mengari yang siwala da ring malda—mirikilan ya man o ali. Ugali na na ing ipasyag na nung nanu ing panamdam na at pati na ring aliwa kapamilatan da ring kawatasan.
***
Dake Talabaldugan
minamuki – migyagyag, menamuyut, minyulsul. English – instigated, induced, convinced, provoked, encouraged, incited, fomented, triggered. Alimbawa king pamangamit: “Alang ninu man a minamuki bang manigaral yang manigtigan gitara i Goryu dapot mebyasa ya pa mu rin agyang magdili-dili ya mu titigtig alus patingapun.”
minanib – minagum, mekiyagum, mekyabe king metung a lupung, katipunan o aguman. English – joined, became a part or member of a group, associated with a group, association or a society. Alimbawa king pamangamit: “Ating dinalang libu kareng minanib keng aguman ding aspak a salu dapot memaglako la ngan alus inyang mesaya na la.”
***
DIPARAN, KASEBYAN at KABALDUGAN
Maralas dang sasabyan deng kabalen a makatwa lakwas na kareng pengari, misan kareng talaturu o agyang kareng pari, ing antini: “Lungub keng metung a balugbub-lumwal keng sumangid”. Inya ating mabubulyo keng kilub ning klasi uli ning antini, o agyang keng kilub ning pisamban at lalu na keng pibale-bale.
Kabaldugan: Buri nang sabyan ning kasebyan ayni ya pin ing atin kang kasabi at katak na kang katak kaybat potang kutnan me ala ya palang asanak keng sablang penyabi mu. Darandaman na ing amanu mu dapot e na sikasu at ing isip na libut-libut ya king metusikluban subali mu keng panyabyan mu. Masasayang mu ing pagal mu, amanu mu pati na wawa mu.
***
MIKANLAPIT at MISUGLUNG KABALDUGANG AMANU
bulusanan – ibulus ing danum o nanu mang mabasa o bage keng nanumang bage o kaninu man.
tugtugan – anti king bulusanan dapot magagamit ya mu nung danum o nanu mang mabasa ing bubulus o tutugtug. Alimbawa neng magugtug kang sese mung tanaman.
diligan – mengari king bulusanan at king tugtugan, magagamit ya kareng tanaman dapot pati na aliwang bage mu naman, ant.imo neng didiligan ing yatsat o paplansang imalan
pisikanan – kasingkabaldugan dang bagya ring bulusanan,tugtugan at diligan oneng ditak mu ing didilig, antimo reng aliwang matakut keng dimla inya pisik-pisik mu neng mandilu la.
patalamsikan – alus kasingkabaldugan ne ning pisikanan dapot padaplis mu ing pisik.
patakanan – ditak a pamamulus, pamanugtug, pamandilig.
sabuganan – dakal at pasalbag a a pamamulus, pamanugtug, pamandilig.
imwan – ing keraklang gagawan kareng matamad mandilu, pisan na ning pisikanan o misan kareng masakit a e na makapandilu.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0945-3795-270.