“Pauli ning ika pekamakamal da kang kakaluguran,
sasabyan Ku keka ing pekamapampang dake ning belwan.
Pakirandaman mu Kanaku iti, pauli ning para king ikakayap mu iti.
Parati mu Kung isipan at magi kang talasuyu Ku.
Samban mu Ku at midaun kang pamigalang Kanaku.
Kanita dasnan Mu kung alang kamalyan.
Pangaku Ku keka ini uling ika ing Kanakung pekamakamal a kakaluguran.
Lakwan mo ngan ding sablang uri ding kapanyamban at sumuku ka Kanaku.
Ikabus da ka karing sablang kablas ding kasalanan. E ka tatakut. ”
~ Dalit ning Kakataskatasang Panginwan | Dangka 18: 64:-66
(The Song of God 18: 64-66)
***
Inyang ati ke pa karing atsan da ring ima mi, neng ila misiping lang bale tuknangan kanita at agnan lang mabuktut kekami, parati lang mipanatu. Mipanapis la atsan at pisasabyan da ing pamagbuktut da at nung kapilan la manganak bang isapwak da na kami. Mibait kaming midalan—ya Eneru 29—at aku Abril 4. Kabang daragul kami megi kaming mikakyalung kareng arapan ming bale karing nanu-nanung pyalung a maging usu kanita angga na inyang dagul ke pang bagya at malyari na kaming makapagaral.
Neng asna ku kalati, salimpusa ku mu keng klasi mi at ing kakyalung ku tagana yang abe karing talapagaral uling metung ya o pekamatas yang dili kekaming mikaklasi. Neng bingut ke pa at kulang pa kamalayan—atad dakit da ke reng pengari mi. Ya deng dara na o metung karela, aku naman i inda ku o ninu mang alang gagawan keng bale at yang mituburan.
Angga na karing matas a balitang o Grade 6, mikaklasi kami at neng Sabadu-Duminggu mikakyalung ke pa. Tawan-tawan, bola, guryun, turumpu, saltik, at nanu-nanu mang pyalung a miyuyusu karing kasing-dagul mi. Misan ating masasambut, misan ating manyambut at abe na nita ing pikunan. Makanyan man, kalabas ning tabugan mikakasundu na namang pasibayu at mamyalung na namang anti sadya.
Milabas ing panaun at tambing meyari na kami keng Grade school at kanita na melagad ing pamiyabe mi uling king Pampanga High School ya linub at aku keng Pampanga Colleges (PC) nung nu ke makabalen. Miyayabe na kami mu neng makauli yang maranun at magpalabas yang oras keng arapan ning pipagaralan ku. Deng aliwa ming kakyalung o kakaluguran ken la namang PC kasi magaral
Mitatag kaming barkada kanita at inaus mi yang Cats. Abe mi la di Eddie Pacia, Tony Yalun, Ricksie Bondoc, Raul Coronado, Jessie Sunga, Levi Cano at Henry Herrero. King campus atin kaming kabarkadang dalaga at mapilan kareti di Lodwina Sunga, Sally Garcia, Dolores Sunga, Jasmin Batac, Elsa Santuangco at aliwa pa. Atin karela ding mipaglolo at melaus miyasawa. Mibantug ya ing Cats king PC campus. Sgt. Pepper's ing patigtig mi angga na king White Album.
Fast forward. College days—king Menila kami. San Beda ya at Aku UST. Maralas kaming lilibut. Puntalan na ku keng boarding house mi at aku pupuntalan ke mu naman at misan makitudtud ku king karela. Manalbe kaming Rock Concerts at daraywan mi nung nukarin atin.
Misan, deng Hell's Angels Juniors e da la pepaluban deng abe na keng yugyugan o terakan da. Mipagtampu la inya deng abe nang aliwang Dan ikami reng miyabe-abe at king mapilan mung aldo migpasya keng mitatag aliwang “gang”. Iti ing KAPISIK.
Woodstock Era.Hippies. Megpakaba ke ngan bwak. Miniem Contreras at koya na, Willie Trinidad, Rolly Tubig, Lito Macaspac, Pepito Soriano angga na inyang merakal na keng merakal at mibantug ya ing Kapisik king Makabebe at Masantul. Tambayan mi ya ing bale dang matwa di Miniem Contreras. Ikaming Dan, maralas kung makitudtud-tudturan keng bale da kanita ba kami mung patigtig plaka o makirandam keng Rock and Roll Machine keng DZRJ o UWFM.
Fast forward, Megobra na kami, ya keng banku king Makati at aku keng advertising agency king Makati mu naman. Melagad ing pamikit mi. Bayu ita mika-manyanggul na ku at ya pepasaup yang mamanikan king Guagua kang Agnes a meging asawa na angga ngeni.
Melagad nang melagad ing pamiyabe mi. Migdatun ku Menila king atlumpulung banwa migit at ya king Makabebe bang pasikanan ing tindangan da a meging Jotans angga na ngeni. Subsub ku king ad agency at ya king negosyu. Nung mikit ke man pamisan-misan mu—mag-videoke keng bale da anggang kapitangan bengi,
Fast forward pasibayu. Dakal na mengapalyari. Mikayanak yang atlu at aku lima la. Inanak ne ing kadwang bungsu ku. Ngeni retired na kami. Mag-paint at susulat na ku mu at ya mag-negosyu ya pa mu rin dapot matagumpe ne king Jotans a mibantug uling alang makasambut keng dakal da eng manyali karela. Save More at Pure Gold masasambut la keng Jotans.
Ita ing makuyad a pamibalikid king bye nang Dan magmula king atsan angga na king kutkutan. King aldo ayti pagmasusyan ing bye nang Dan at ipangadi ing sana maging matagumpe mu naman ing meging bye na keti king yatu at makauli ya king Kayaryan ning Ginung Kakatasakatasan.
***
Ala pamu pung “Dake Talabaldugan” ngeni bang arinan yang maragul a kabilyan ing main article dikil king pamanalala king memun nang kakalugurang i Danilo Saturnino Sawal “Dan Jotans” Garcia.
***
DIPARAN, KASEBYAN at KABALDUGAN
Maralas dang sasabyan deng makatwa ing antini kanita: “Bala linabas ya ing angin a bulag o daig ne pa ing lebasan ning angin a bulag”
Kabaldugan: Masasabi ya ing antining pamanyalita neng ating taung e na ka papansingan agyang ikit na ka o mitagmu kayu. Deta reng mapagmaragul, matas turing king sarili da at mapaglati karing para dang tau. Agyang kakilala mu neng malambat, labasnan na ka bala ala ya mang ikit.
Inya bala angin yang bulag.
***
MIKANLAPIT KABALDUGANG AMANU TAMU
⦁ balikdan – itang lumawe ka keng kagulutan mu bang akit mu ing kekang lebasnan, o balikan mu ing kekang napun o milabas.
⦁ batsawan – lumawe keng matas a kabilyan bang akit la ring nanu man o ninu man ati king sulip o lalam mu.
⦁ dungawan – anti king batsawan, lumawe keng matas a kabilyan bang akit la ring nanu man o ninu man ati king sulip o lalam mu., dapot ati ka keng awang inya pin dudungo ka.
⦁ talangan – anti king batsawan at dungawan, dapot lumawe keng lakwas mababang kabilyan bang akit la ring nanu man o ninu man ati king lakwas matas keka.
⦁ suglapan – padaplis a pamaglalawe.
⦁ pagumasdan – matikding pamaglalawe.
⦁ syasatan – lakwas pang matikdi kesa keng pagumasdan uling ating dagdag a pamanaluse.
⦁ lawen – gamitan la ring mata bang manakit.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com/ mag-text o maus para karing kutang o munikala: 0942-3924-399 o 0945-3795-270.