“Atwagan la ring marok a kapagnasan ning kayanakan at pagdulapan
ing katalarwan, kasalpantayanan, lugud at kapayapan,
agnan da ring mamaus king Ginu manibatan king dalise pusu.”
~Kadwang Aklat nang Timoteu | Dangka 2: Sunis 22
(2 Timothy 2:22)
“Inya sa sasabyan ku, lumakad kambe ning Diwa,
at e mu panusignan ing kapagnasan ning laman.
Uling ing laman pagnasan na nung nanu ing salang king Diwa,
at ing Diwa nung nanu ing salang king laman.
Misasalangsang la king balang metung,
inya sa e mu daraptan nung nanu man ing kaburyan mu.”
~ Galisyanu | Dangka 5 : Sunis 16-17
(Galatians 5: 16-17)
“Ating atlung pasbul palub king alang-anggang parusa—pamangaybugan,
mwa at kasakiman. Balang masalese tau dapat da lang itabili reti,
pauli ning paunturu la king pangababa ra kauryan ding kaladwa.
Ing taung atakasan na na la ring atlung pasbul a reti ning parusang alang-angga,
O anak nang Kunti, darapat yang gawang makasaup king pamangilala king sarili
inya sa’t ditak-ditak darasnan na ing kakataskatasang parasan.
Dapot ninumang tatabili na la ring pangdiwang utus at kikimut ya
agpang king sarili nang gyam e na darasnan ing kapantasan, agya man ing ligaya,
agya man ing kakataskatasang parasan.
Ninu man dapat nang asanak nung nanu ing tungkulan na at nung nanu
ing e na tungkulan kapamilatan ding tuntunan ding kasulatan.
King pangabalu kareting batas at tuntunan, ninu man dapat kimut
bang ditak-ditak yang mitas.”
~ Dalit ning Kakataskatasang Panginwan | Dangka 16 : Sunis 21-24
(The Song of God, 16: 21-24)
***
Nung asna ka kalungkut, kaybat isipan mu pa ing malungkut ka, buri mu pa ing kalulunusan ka at malulunus ka king sarili mu—bolang ka! E mu na sukat pigunam-gunaman ing kalungkutan mu, pigunamgunaman mu ing nung nu ka o kaninu ka makapagsantung—king Ginu, at karing Nwan nang Lagyu o king Dalise nang Talasuyu bang akalingwan mu ing nanu mang kaligaligan at kalungkutan mu at magi kang matula at maligaya king pamiganaka mu king Ginu kapamilatan ning pamakirandam at pamigale karing Lagyu nang Banal king saup at antabe ning Dalise nang Talasuyu—ing Guru, a matalik nang kakaluguran.
Ati ka king ilang a asna kalangi at pane mung balas ing akakit mu. Antita nung makarayu ka king Dyos. Inya pin asna ka kawa uling alang malyaring inuman a danum keng malanging ilang. E mu na pakikwanan pang mipasno king kawa mu at pipilitan pamalipitan ing balas bang manikwa ka agyang kapatak mung danum karin uling agyang nanan mu at nanu mang gawan mu, ala kang apigang danum keng balas.
E ka mamangan balas, minum kang danum. Dayu ka king balas at lumapit ka king Ginu ba na kang mipasno, milako kawa at kumabsi king lugud Na kapamilatan ding Kayang Nwan a Lagyu a pigkaluban Na karing sablang upaya Na, a alang pamiyaliwa Kaya.
***
Dake Talabaldugan
⦁ minaninag – meyakit aninag, abakas, linto makabakas. English – seen through, seen slightly, was able to discern visually. Alimbawa king pamangamit: “Minaninag ya aske ing taung ati yu king gulutan na ning tabing inya mekapangilag ya i Buru bayu ne pa atabak ning bisang makamate kaya.”
⦁ minanlwagi – ginanap antinganlwagi o alwagi. English – worked as a carpenter, did some carpentry jobs. Alimbawa king pamangamit: “I Osung ampo ing kapatad nang i Puling ila ring minanlwagi keng bale da ring apu mi inya ila mu naman deng pepaglarinan da inyang mangasira ne.”
***
DIPARAN, KASEBYAN at KABALDUGAN
Maralas dang sasabyan deng makatwa pati na ding kayanakan a kabalen ing antini: “Ya rin itang mandilu—manggugu!”. Nung mandilu ka kabud ka mu manugtug danum at magbasa bwak? Antita mo? E magugwan o gamitanang gugu o shampoo ing bwak mu ba'ya namang luminis at bumanglo? Anti keng pamandilu, ing pamangawa king nanu mang bage sukat yang aryan masalese.
Kabaldugan: Lubuslubusan gampanan at aryan ing nanu mang ayumpisan at gawan na iting itang pekamasanting at pekamayap a malyaring daptan. Aliwa itang inumpisan mung aplit kaybat inatwagan mu na kabud makabitin keng angin a e pa yari.
Inumpisan mu na inya gawan mu na ing agyu mu bang mayari iting masalese at kapakipakinabang at pantas.
***
MIKANLAPIT at MISUGLUNG KABALDUGANG AMANU
⦁ bulusanan – ibulus ing danum o nanu mang mabasa king metung a bage o mekad tau o aliwang mabibye bang mandilu o luminis. Magagamit ya naman king pamamulus king bage mabasa o mamasamasa antimo king pamangan ating sabo o king inalung balas at simentu at aliwa pa.
⦁ tugtugan – mengari king bulusanan dapot maralas magagamit king danum mu neng tutugtug keng tanaman o nanu mang bage.
⦁ pisikanan – kapurit a pamamamasa o pamagbasa king sarili o kareng aliwa gamit ing danum o aliwang bage mabasa.
⦁ patalamsikan – kapurit a pamamamasa o pamagbasa king sarili o kareng aliwa gamit ing danum o aliwang bage mabasa oneng daraptang makarayu.
⦁ diligan – maralas magagamit keng pamanugtug tanaman at aliwa pang bage mangaylangan basan.
⦁ patakanan – ditak o kapatak mung pamanugtug keng danum o nanu mang mabasang bage.
⦁ sabuganan – dakal at masikan a pamanugtug keng danum o nanu mang mabasang bage manibat keng marayu o papunta keng makadayu.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0945-3795-270.