“Pamun na, Ligaya, aslag ka king bye ku;
Bista ma’t masukal ku lub, tipang pisyag dapat mung tupdan ku.
Dalumdum king kanatba, sumangid da reng mata,
Ing dimla ning galingaldo, dimdam ku karing taliri mu!
Pamun na, Ligaya…ume na ku mawli,
Karing penandit ala ku keti, ing munag daig ne pa’ing bengi!
Gulutan da na ka, marap dayat ding kasalang;
Paroba at paralaya, pikaras no ning diwa king ilang.
Pamun na, Ligaya…e da ka kalingwan.
Bista ma’t lakwan ku’ing keti, dit’mu man, e da ka kalingwan!
Pamun na, Ligaya! Pamun na, Ligaya!
Pamun na, Ligaya! Pamun na, Ligaya!
Pamun na, Ligaya! Pamun na, Ligaya!
PAMUN NA, LIGAYA
-Kragi 2004-2005
“Agwat.
Pilatan.
Sukad ning pamikawani.
Dingkal ning dayu.
Sikdan ning kelambatan
O ning keynipan.
Laut.
Deywan.
Lapad ning pamikaliwa.
Dekalan ding takbang.
Sampulung ding talampakan.
O sakmal ning pamaniglo.
Kapagnasan man
O sirya.
O mekad mo, ali man.
Nanu mo ta’ng pamyaliwa?
Talab na magdili-dili.
Basal king kalubkuban.
Ala na ka king panimanman.
Ala na ka king panandam.
Panamdam a metampud na.
Mepata nang manenaya.
Manintun king aske mu.
Metung ya mu pin ing yatu
At adwa lang paglakbang ku
E da ka pa mu rin dasnan
Nung e mu iti kapagnasan
Ing pamikit pasibayu…
Ing agwat o pilatan
Mandatila nang makanyan.
Alang nanu mang libutad
Nung e na’ing pamanalala.
Pamiganaka;
Pamibalikid;
Pamibatso king nanu mang bukas
A mekad e na datang pa.
Agwat na’o pilatan
Ing kekata’ng kasuglungan”AGWAT
-Kragi 42907
Makapalpikasala man
Kanaku lang paniglawan
Alino mung mengatagan
Kening ka’kung pisantungan.
Nu’na anti pangalablab,
Bulung miyanyud king atab?
Lakwas meng darayu tangab,
Lakwas ya pang kakalabkab.
Mikit katang sinakurap
Legwan mu lusuk linaplap;
Ngeni bina kung magdulap
King aske mung sinakildap.
Pamaniglo anting danup
O kawang ka’ku sisinup;
Pamaglingad alang saup
Dalumdum ka’ku sasakup.
Pamisangkan pamampan ku
Pilubluban meging lisu;
Katapatan telukbung ku
King panamdam binang lilu.
Ika naman kasi pusu
Mengari kang kislap gintu.
Agyang ing aslag andam mu
Anti kang kildap mibubu.
Isip ku mangasalapid
Wangis bulak mipapayid.
Sula-sulagpo king gilid
King diwa ku makatakid.
Pamun metung kalaraman
E laus king pilibluban;
Laut ning ka’kung kaysipan
Uli ning panalumduman.
“Pamaniglo” ~ Kragi 42807
***
Daranasan ing malalam a sugta king kapanamdaman o kaplas neng malilyari ing pamikawani kaybat ning makabang pamiyabe. Kasi, mikaka-malalam at matikding lakap na o deep and intense attachment. Ding penandit a miyabe-abe kayu pa e yu man apapansingan a malilyari ing lakap o attachment. Mekad masusumami ko pa keng balang metung pauli ding amanu, dapat o nanu mang maging sangkan na niti.
Ditak-ditak milalabas ing panaun a e yu man amamalayan at mapalyaring mipagkasawa kayu lupa o e yu apibata ing e mayap a panugali ding balang metung. Makasora. Makasukmami. Makakamwa o misan maging sangkan ning e pamikasundu a miraras keng pamipate. Kasi naman, e ta sasalang-alang ing kapanamdaman da reng aliwa. Magi tamung pata at akakalingwan a nanu mang sabyan tamu o daptan tamu malyaring makapanasakit kapanamdaman kareng aliwa.
Makanyan man, datang at datang mu rin ing pamikawani bisa ta't e bisa pauli ning nanu mang sangkan—pamanalis tuknangan, pamanintunan king aliwang balen o bangsa, pamagkyasawa, e pamikasundu, pamipate o maralas—pauli ning kamatayan. Kanita tamu pamu akit ing ulaga ning balang metung at kanita tamu abalu a ing pemandapat tamu kapamilatan ding amanu o dapat o pauli ning e ta pamanyabi o e pamandapat karing sukat sabyan o sukat daptan. Kanita tamu pa mu naman sisisi. Mu pin tawli na. Ala ta'nang akarapat uling mikawani ta'na.
Kanita na danasan ing kaplas.
***
Dake Talabaldugan:
1.ne¹– amanung pamakisabing mayap. English: please, kindly, if you please, if you won't mindokay? Alimbawa king pamangamit: “Kaku n'ya mu ing kekang imalan a maputi potang e mu ne susulud, ne?”.”
2.ne²– meyari na, meganap na, milyari na. English: already, done, over., by this.that time, by now.then, thus far, hitherto Alimbawa king pamangamit: “Kanita panupaya na kayu pa, oneng neng e ye papansingan kareng panabilin na kinasna ya at sinawa ne kekayu.”
3.neng – when, during. English: when, during, througout, in the course of, Alimbawa king pamangamit: “Kanita panupaya na kayu pa, oneng neng e ye papansingan kareng panabilin na kinasna ya at sinawa ne kekayu.”
***
DIPARAN at KASEBYAN
Maralas dang sasabyan da reng kabalen ing antini:
“Mantun kang kaplas mung balat?” Neng mimwa o mikakapali la reng pengari o ninu man, agad dang sasabyan o kukutang ing antining pamangamanu.
Kabaldugan: Anti mu naman king bisa kang manasaket?
***
MIKANLAPIT at MISUGLUNG KABALDUGANG AMANU
1.kaplas – panamdaman neng masusugat o neng ing sugat midirinan yang nanu mang bage bang damdaman iti.
2.kasakitan – panamdaman neng manasakit ya ing katawan, isip o kapanamdaman.
3.mangaplas – makaramdam kaplas.
4.kirut – panamdaman neng masusugat o magagalus o neng daranas bage makapanasakit kapanamdaman.
5.kikirut – pangdiwa ning amanung kirut..
6.manasakit – makaranas sakit o kasakitan.
7.mangaplas– makaranas kaplas.
8.dusa – kasakitan a daranasan neng manasakit pauli da reng aliwa.
9.parusa o padusa – kasakitan neng makaranas sakit a gagawan da reng aliwa.
10.sakit – panamdam neng manasakit ya ing katawan, isip o kapanamdaman.
***
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0905-2162-419 o keng Facetime: 0999-3654-490.