“ Nganang sinabi ning Kakataskatasang Panginwan: Kanakung pakamalang Ardyun, pauli ning e ka marirya Kanaku, idake Ku keka ining pekamakapampan a belwan,
at neng abalu mu iti mikabus ka karing kasakitan ning makalabwad a kayatinan.
Ing belwang iti ya pin ing ari ning pamagaral, ing pekamakapampan
karing sablang makapampan. Iti ya ing pekabasal a belwan, at uli ning magkalub ya iting matulid a kamalitan ning sarili kapamilatan ning kapamaltutwan,
iti ya ing kapantaspantasang pamanyamba. Ala yang angga iti, at matula ya iting gagampanan.
Deng e tapat king paynturwan ning makaparikil a kasuywan e da Ku dasnan,
O sinaul karing kasalang, nung e mibalik la king pamibait at pangamate keti
king panglabwad a karinan.
Kapamilatan Ku, king aske Kung e makalto, ing laganas a sikluban mililibutnan ya. Ding sablang mabibye ati lu Kanaku., dapot ala Ku karela.
Makanyan man ding sablang melalang e la makasandal Kanaku.
Pagumasdan mu ing Kanakung kabal a pibandyan! Agya mang Aku ing manese
karing sablang mabibye, at agya mang ati Ku mu man Karin,
Aku pa mu rin ing kabud mung pagmulan ning pamaglalang.
Nung makananung ing anging masikan, lalabul ya nu man karin,
pane makasandal king pilatang e amalit, balwan mung antita la mu
namang makasandal ding sablang mabibye Kanaku.
O anak nang Kunti, king wakas ning kata-katangbanwa balang panglabwad
a kayalton lulub king Kanakung kalikasan, at king kamumulan
ning aliwang kata-katangbanwa, kapamilatan ning Kanakung talab maglalang
Kung pasibayu.
Ing mabilug a talatag ning sikluban makapaylalam Kanaku. King kaburyan Ku
lalto ya iti paulit-ulit, at king kaburyan Ku, malalasak ya king kawakasan.
O Danandyaya, ing sablang gagawang ayni e na Ku agapus.
Makakawani Ku parati, makalukluk mengaring e mangabiran.
Ining makalabwad a kalikasan darapat lalam ning Kanakung pamipatuntun,
O anak nang Kunti, at mamunga yang gagalo at e gagalo bage. Kapamilatan
ning tuntunan na ing kayaltawang ayti malalalang ya at malalasak yang paulit-ulit.”
~ Dalit ning Kakataskatasang Panginwan | Dangka 9: Sunis 1-10
(The Song of God 9: 1-10)
Ing keraklang kapanwalan da ring dakal a talasalpantayang Kristyanu o agyang ding Muslim metung ya mu ing Banal a Kasulatan, ing Biblya o ing Koran at ding aliwang talasalpantaya e la marayu karela kapanwlan. Inya sa't balang metung karela anting lupung ila mung makatud kapanwalan at ing sasamban da anting Kakataskatasang Panginwan o Dyos ya pin mu ing karelang “Dyos”.
Mangabaldugan itang ing Dyos a masasambitla karing aliwang Banal a Kasulatan—e Ya tutu uling ing karela mung Dyos ing tutu o mekad isipan da aliwa yang Dyos ita. Uling e ya metung ing kasalpantayanan keti king yatu—mangabaldugan a para karela dakal la reng Dyos. Inya pin sa, ngana ning metung a Talaturung dalise talasuyu: “Deng boksingeru ngeni pane lang mangadi bayu la makibakbakan. Ing metung keng Dyos da kanu reng Kristyanu at ing kalaban na, keng Dyos da kanu reng Muslim agpang kareting boksingeru.
Oneng atin mu namang misan, Muslim lang pareu deng milalaban. Ing metung mangadi ya kang Allah. Ing kalaban na, mangadi ya naman kang Allah. Ing kutang kanita, “Kaninu ya makakampi kanita i Allah?” At kabud manyambut ne ing metung karela, ing kutang--o't metung ya mu ing kimpyan nang Allah?
Alang metung mung Banal a Kasulatan ing pantas king kalamnan na, uling agyang king Biblya makasulat at masasabi king Wan, Dangka 21: Sunis 25: “I Yesus dakal ya namang bage pemandapat, Nung bakang metung kareta misulat la ngan, mekad agyang ing mabilug a yatu e ya mikasilid para karing aklat a misulat.”
Alang metung mung aklat ing malyaring pidatukan karing sablang belwan dikil king tibubus a katutwan uling ala yang angga ing katutwan.
Dake Talabaldugan
⦁ minatab – miragdag o mitas ing danum keng dagat kambe ning albug keng mamala. English – tide level got high. Alimbawa king pamangamit: “Memagtas ngan ing albug king kabalenan kaybat karing sibabaranggay inyang minatab bigla alang katunan-tunan..”
DIPARAN, KASEBYAN at KABALDUGAN
Maralas dang sasabyan da reng kabalen ing antini:
“Sigpang na la ding gamat a papakan kaya.” Deng siseseng asu keraklan karela tapat la karing karelang panginwan at marayu karela ing kinisan da la reti. Sari la katapat karela.
Kabaldugan: Agyang malagad kareng sese asu ing sasagpang kareng papakan karela--subali mu nung samsaman mu karela ing nanu mang kakanan da—nung daptan ing pamanyamsam kabang samal lang mamangan e marayung agyang sese mo pa sagpangan da ka.
Dapot kareng tau, a daig do pa reng asu, dakal lang anting asung manyagpang kareng sukat dang balikdan utang lub uling atin karela ing alang utang lub. Kaybat da kang pekinabangnan gawan da kang anting basan o migit pa.
MIKANLAPIT at MISUGLUNG KABALDUGANG AMANU
⦁ kasapunggul – abe-abe bungang tanaman o bulaklak
⦁ kapiling – magagamit karing sagin a abe-abe manibat pa inyang ken lang pusu o bulaklak ning impun sagin.
⦁ kayabtas – makatali o makayabtas anti reng suman, bobotu o agyang deng aliwang bungang tanaman.
⦁ kabungkus – mengari keng kayabtas dapot e kaylangan makatali o makayabtas.
⦁ katumpuk – kalag-kalag a bungang tanaman, uling milako na king tampuk.
⦁ kasakmal – dekalan ning nanu mang bage makapalub king makasakmal a gamat.
⦁ kayagpa – sukad agpang king pangayagpa ning tau, inya e ya binang makatud uling e la lupa-lupa kaba gamat deti.
Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king muirbiliuqeitpo@gmail.com mag-text o maus para karing kutang o munikala: 0942-3924-399 o 0945-3795-270.