Sumala sa Philippine Statistics Authority (PSA), ang `road accidents’ ang nag-unang hinungdan sa kamatayon sa mga Filipino nga dili gikan sa sakit (non-disease). Karon lang 2023 (Enero 1-Abril 11), ang PNP nakatala na og 1,499 deaths. Tan-awa ang mga celebrity nga nalambigit sa trahedya sa kadalanan tungod sa disgrasya sa sakyanan. / Mga Litrato gikan sa Facebook
CLAUDIA ZOBEL
Ang Cebuana actress nisikat sa sexy movies niadtong `80s apan naputol ang suwerte human nabangga ang iyang gimanehong sakyanan sa Makati city niadtong Pebrero 10, 1984. Niabot pa og 15 minutos una naibot ang iyang lawas nga napiit sa manubela. Si Zobel namatay sa edad nga 19.
JAY ILAGAN
Ang award-winning actor nagmaneho sa iyang motorsiklo sa may Tomas Morato dihang gibundol og awto ang iyang motorsiklo. Ang driver sa awto giingong nakainom samtang si Jay wala sab magsul-ob og helmet. Sa kakusog sa impact, nalagpot ang aktor ug nabagok ang ulo. Si Jay namatay sa edad nga 37 niadtong Pebrero 4, 1992.
RIC SEGRETO
Ang OPM hitmaker patay diha-diha human napasok ang iyang gimanehong motorsiklo sa gitukod pa lang niadto nga Buendia flyover sa Makati niadtong September 6, 1998, kun tulo ka semana sa dili pa ang iyang ika-46 nga kasumaran. Lakip sa iyang hits ang “Kahit Konting Pagtingin” ug “Give Me A Chance.”
WILLY GARTE
Usa ka buta nga singer nga nisikat sa mga kantang “Bawal na Gamot” ug “Nasaan ang Liwanag.” Si Willy gikan og tukar ug gikuha sa iyang papa tungang gabii sa September 4, 1998. Apan samtang nanglabang sila sa Edsa naligsan si Willy og 10-wheeler truck nga maoy nakaingon sa iyang hinanaling kamatayon sa edad nga 36.
EDDIE PEREGRINA
Ang Original Jukebox King nakabsan sa edad nga 32 niadtong Abril 30, 1977. Nabangga ang iyang gimanehong sakyanan sa trailer truck sa may underpass sa Edsa. Si Peregrina nahimong leading man nilang Nora Aunor ug Vilma Santos sa pelikula.
RUDY ENTERINA, JR.
Niadto lang Abril 29, ang 58-anyos nga ex-PBA Cebuano player patay usab diha-diha human giingong nawad-an og kontrol sa iyang gimanehong motorsiklo ug naligsan sa nagsunod nga prime mover sa South Road Properties.
LINO BROCKA
Dead-on-arrival ang 52-anyos nga 70s most-influential film director niadtong Mayo 22, 1991. Ang iyang Toyota Corolla nabangga sa poste sa kuryente nga gimaneho sa iyang higala samtang padung na unta silang mamauli gikan nanan-aw sa show ni Malu Barry.
MSGR. TEOFILO CAMOMOT
Daghan usab ang nahugno sa pagpanaw sa buotang Arsobispo sa Carcar. Ang iyang sakyanan nabalintuwad sa San Fernando, Cebu nga niresulta sa iyang kamatayon sa edad nga 74 niadtong September 27, 1988. Sa pagkakaron nagpadayon ang proseso sa iyang pagkasanto.