NAGSUGOD na sa pagbiyahe ang 12 ka mga elegante ug modernong mga sakyanan sa Rural Transit Mindanao Inc. (RTMI) human gi-presentar sa media sa Land Transportation and Regulatory Board (LTFRB) niadtong Huwebes, Enero 24.
Ang Yanson Group of Bus Companies nga kanhi Vallacar Transit, Inc. maoy nag-una nga transport bus company sa Visayas region, mapasigarbuhon nga mi-presentar sa ilang mga brand new nga mga bus diin dugang kini sa mga anaa na sa 314 ka mga unit nga nag-operate sa nagkadaiyang dapit sa Mindanao.
Naggamit na kini og mga mas high-technology sama na lamang sa buspad diin pwedi makapili ang pasahero og nagkadaiyang mga movies, music, games, news, ug uban pa.
Ang matag unit duna'y 37 seats ug two-by-two seating arrangement, luxury reclining passenger seats, LCD monitor, USB port, close-circuit television camera, Wi-Fi, folding table with cup holder, leg rest, middle arm rest, foot pedal, luggage rack with cover, reading lamp, aluminum passenger and luggage compartment, toilet, ug GPS.
Gawas niana dili na usab mahasol ilabi na ang anaa sa likod nga bahin maglingkod tungod na usab duna na lamang pinduton aron nga mag-buzz ngadto sa drayber diin pasabot nga mo-kanaog na ang pasahero.
Mibutyag si Leo Rey Yanson, YGBC President ug CEO, nga ang mga elegante nga gipagawas nga mga bus kini tungod sa ilang padayong serbisyo sa publiko.
“We are making a major venture to modernize our fleet with new and elegant technology that will provide ultimate riding experience to our stakeholders,” atol sa paghatag niini og mensahe.
Samtang atol sa pagpresentar sa mga media mibutyag usab si Jessie Boy Lentorio, branch manager sa RTMI-Yacapin nga kini lakip usab sa modernization program sa gobyerno.
“Part of modernization program which is RTMI would like to provide extra ordinary services to the riding public,” matud ni Lentorio.
Nagpasalamat usab ang tinugyanan sa LTFRB-Northern Mindanao nga si Aminoden Guro, Regional Director sa RTMI, gumikan kay ang mga daan nga mga unit sa RTMI gi-ilisdan na kini og brand new ug compliant na, diin duna ni Wi-Fi, closed-circuit television camera, ug speed limit.
“Nagpasalamat ta sa Region 10 (Northern Mindanao) particular sa Cagayan de Oro kay aduna pud ta'y bag-o nga mga bus sa RTMI nga bag-o lang nato gi-approved, ang ila nga mga daan nga unit gipulihan nila og brand new,” matud ni Guro.
Gidugang pa niini nga luwas kini tungod na usab kay gi-agi naman kini og mga pagsusi ug dili kini makadagan kung wala masuta gikan sa Philipine National Standard.
“Ma-entertain atong pasahero, when it comes to safety dili gyud ni sila ingon nga makadagan kung wala ni sila ma inspection sa atong Philippine National Standard sa DTI (Department of Trade and Industry) so ang safety ani, ang modelo ani is 2019 so nipasa gyud ni sa Philippine National Standard as Public Utility Bus,” dugang niini.
Nasayran nga kining 12 ka mga luxury bus sa RTMI magbiyahe gikan sa dakbyana sa Cagayan de Oro paingon sa dakbayan sa Davao. (KCS)