MOABOT ngadto sa 16 ka mga lungsod sa probinsya sa Misamis Oriental nakadawat og farm machineries gikan sa buhatan sa Department of Agriculture (DA)-Northern Mindanao.
Gitunol ang mga kabtangan niadtong Martes, Oktubre 9 diin gilangkoban kini ngadto sa 55 ka mga machineries nga mobalor og P10,492,938 ug laing 20 ka mga modules livestock nga mobalor sab og P2,452,096.
Sa kinatibuk-an, moabot ngadto sa dul-an P13 milyones ang makabenipisyo nga mga mag-uuma sa kalungsoran aron mapaspasan ang ilang mga trabaho diha sa pag-uma.
Dako kini og tabang sa pagtanom ug cassava lakip palay ang maong mga ekipo.
Ang pagtunol gipangunahan Audy Maagad representative sa Supervising Agriculturist o HVCDP focal person kauban sila si Nilda Salas, Center Chief Provincial Operations Center Misamis Oriental & Camiguin; Mario Jamis, ang PAFC Chairman sa Misamis Oriental; ug Provincial Agriculturist Jose Apollo Pacamalan nga gitambongan sab mismo ni Governor Yevgeny Vincente Emano.
Dugang sa maong kalihokan ang pagtunol sab sa 75 ka mga ekipo gikan sa DA ngadto sa mga mag-uuma sa lungsod sa Opol, Misamis Oriental.
Ilang mga nadawat nga gikan ang pundo sa Rice program ug corn program sa DA gilangkoban sa power tiller – hand tractor/pull type; power tiller – floating boat type; mechanical rice reaper; 4WD farm tractor; mobile corn mill; moisture meter; cassava grater, cassava chipper; hammer mill; ug cassava gramulator.