MOKABAT sa 18 ka mga sakyanan ang na-isyuhan og violation receipt human wala nakapasa sa gipahigayong emission testing lunot na usab sa pagpatuman sa anti-smoke belching law sa siyudad sa Cagayan de Oro sugod Lunes, Hunyo 3, 2019.
Gibutyag ni Engr. Armen Cuenca, tsirman sa City Local Environment and Natural Resources (Clenro), nga ang maong ihap nga 18 ang na-isyuhan og resibo nga nakalapas kini sa maong ordinansa.
“Gi-isyuhan og ordinance violation receipt ang 18 ka mga sakyanan nga wala nakasubay sa standard nga emission alang sa mga sakyanan nga gabiyahean sa siyudad,” matud ni Cuenca.
Dunay multa ang mga nakalapas nga anaa sa P500 ug pasakaan og kaso kung dili kini atubangon ilabi na kung dili gihapon mosunod niining gi-implementar sa siyudad.
Giingong anaa usab sa 45 ka mga sakyanan ang napailalom sa maong testing tungod kay ubay-ubay ang nisibat ug wala nilahos sa dihang nasutang anaa ang tinugyanan sa Clenro.
Gidugang usab niini nga dunay nagreklamo nga pasahero human nga gipakanaog tungod kay dunay emission testing hinungdan nga gireklamo kini ug gikuha ang numero sa plaka sa maong sakyanan.
“Mag adjust mi sa area kana gyung dili nila malikoan, wa nay laing maagian ba,” dugang niini.
Giduso na usab sa tinugyanan sa Roads and Traffic Administration ang maong panghitabo aron masuta kung kinsa ang nagmaneho sa maong sakyanan.
Nasayran nga hugot kining gipatuman sa siyudad sugod Hunyo 3, matag adlaw sa Lunes hangtod sa Biyernes.