PATAY ang duha ka mga lalaki nga gikan namista human nabangga ang gisakyan nga motorsiklo sa naparada nga trak mga alas 3:30 sa kaadlawon niadtong Biyernes, Disyembre 13, sa Sayre Highway, Purok 7 Upper, Puerto, ning siyudad sa Cagayan de Oro.
Ang mga biktima mao sila Joel Sadlucap, 33, minyo, residente sa Purok 2, Mambatangan, Manolo Fortich, Bukidnon; ug Hermer Clavejo, 35, minyo, residente sa Purok 1, Balubal, ning siyudad, ug usa ka empleyado sa Phoenix Petroleum.
Gimaneho ni Sadlucap ang Rusi motorcycle nga nagdala sa plaka nga KC22043 nga nakarehistro sa usa ka Danilo G. Estonilo, taga Baikingon, ning siyudad.
Ang drayber sa sakyanan nga prime mover truck nga nagdala sa numero sa plaka nga MVG 493 nga nakarehistro sa Phil Asia Logistics Inc., El Salvador, Misamis Oriental naila nga si Joaquin Alcala, 50, ulitawo, ug resident sa Dansolihon, ning siyudad.
Gibutyag ni Police Captain Mario Mantala, hepe sa Police Station 6 (PS6) sa Puerto, nga base sa nakuhang impormasiyon gikan namista ang mga biktima sa Villanueva, Misamis Oriental ug posibleng naka-inom.
"Base sa info nga nakuha, gikan namista ang mga biktima," matud ni Mantala.
Sa inisyal nga imbestigasiyon, gikabutyag nga samtang gisubay sa motorsiklo ang highway gikan sa Puerto paingon sa Balubal nibangga kini sa nakaparada nga sakyanan ug tungod sa kakusog sa impak rason sa pagkalagapak sa duha ug niresulta sa ilang hinanaling kamatayon.
Samtang gibutyag usab ni Alcala nga niparada siya sa dapit tungod sa sugo sa lawas.
Ang maong drayber ang kasamtangang gikustodiya sa kapulisan karong panahona.