IMBES nga makaginansiya, ibayad na lang sa multa sa duha ka mga gapamaligya sa sementeryo ang ilang kinitaan human padayon nga nisupak sa ordinansa sa dakbayan sa Cagayan de Oro.
Kini human nga nasapon sa tinugyanan sa City Local Environment and Natural Resources Office (Clenro) ang duha ka mga gapamaligya sa maong sementeryo kinsa nag-isyu pa og plastik sa mga mamalitay.
Gibutyag ni Engineer Armen Cuenca, ulo sa Clenro, nga ila nga gi-isyuhan og violation receipt tungod sa paglapas sa maong ordinansa.
“Duna tay nadakpan didto nga gi isyuhan gyud namo og ordinance violation receipt ang naggamit sa plastic bag nag-isyu. Naa’y namaligya didto nga nag-isyu og plastic bag,” matud ni Cuenca.
Gikabutyag nga magbayad kini og anaa sa P3,000 matag usa kanila.
Nasayran nga ang multa sa nakalapas niining maong balaod anaa sa tres mil ang multa matag plastik.
“Duha, P3,000. Kung among ihapon daghan man. So isa lang kay luoy man pud,” dugang pa.
Gibutyag usab ni Cuenca nga bisan pa nga mas hapsay na ang dagan karon sa city public cemetery, daghan pa gihapon sila og angayang himuon aron nga mas malambo pa ang pagdumala ug paghatag og serbisyo sa katawhan.