MAPASALAMATON ang Cagayan de Oro City Police Office (Cocpo) sa Police Regional Office (PRO)-Northern Mindanao, human gidugangan na usab og laing mga personahe ang ilang buhatan alang sa pagpatuman sa mga gabayan ug kamandoan sa dakbayan kalabot na sa bahad sa coronavirus disease (Covid-19).
Anaa na sa 251 ka personahe ang nadugang sa Cocpo human nga dunay laing 50 ka personahe.
Gikabutyag ni Police Major Evan Viñas, tigpamaba sa Cocpo, nga ning bag-ohay lang nagpadala na usab og laing pwersa ang PRO-Northern Mindanao.
“Karon bag-o namo nadawatan, singkwenta ka personnel augmented sa Cocpo ug mikabat na sa 251 ka augmented personnel gikan sa regional headquarters,” matud ni Viñas.
Gidugang pa nga mapasalamaton ang city director sa Cocpo nga si Police Colonel Henry Dampal kang Police Brigadier General Rolando Anduyan, regional director gumikan na usab kay dako na kaayo ni nga tabang aron nga mas mapalig-on pa ang kampanya ug pagpatuman sa mga kamandoan sa dakbayan.
“Ang atong Cagayan de Oro City Police Office ubos sa pagdumala sa atong City Diretor Police Colonel Dampal mapasalamaton sa atong ever dynamic Regional Director Police Brigadier General Rolando Anduyan nga nagpadala napud og mga pwersa,” matud ni Viñas.