ANAA na sa 28 ang natalang kaso sa coronavirus disease (Covid-19) sa Cagayan de Oro human nga natala ang laing locally stranded individual (LSI) ang nagpositibo sa RT-PCR test nga nigawas niadtong Hunyo 24, 2020.
Kini mao ang 22 anyos nga lalaki nga taga Barangay Bulua kinsa gikan sa Cebu City ug nakaabot sa siyudad niadtong Hunyo 14 kinsa diretso nga gidala sa usa sa mga City Isolation Units (CIU) labi na sa temporary treatment and monitoring facility (TTMF) sa siyudad ug wala nakauli sa ilang panimalay.
Gibutyag ni Dr. Joselito Retuya, epidemiologist sa City Health Office (CHO), nga nakita kini nga positibo pinaagi sa RT-PCR test ug nigawas ang resulta Hunyo 24. Gi-swab kini human unang nagpositibo sa rapid diagnostic test (RDT).
"Ang atong 28 nga case wala'y gipamati so meaning to say asymptomatic," matud ni Retuya.
Gidugang pa niini nga duna kini mga nakasakay sa barko nga anaa sa 80 ka mga indibidwal apan 4 ra niini ang iyang close contacts kinsa kauban gyud sa cabin sa gisakyang barko ug duna'y mga naka-istorya nga anaa sa mga napulo.
"Kini iyang direct contacts nga upat ka buok ato ng ginatawag and then atong i-schedule kay namatikdan nato sa atong contact tracing nga sa sulod sa ilang cabin wala sila mag practise og minimum health standard," dugang pa.
Kini ang 28 ka mga natalang Covid-19 sa siyudad diin 1 sa numbered Barangay, 3 sa Barangay Bulua; 11 sa Barangay Carmen; 3 sa Barangay Lumbia; 1 sa Barangay Kauswagan, Barangay Indahag, Barangay Iponan, Barangay Agusan, Barangay Nazareth ug Barangay Pagatpat; ug 4 sa Barangay Camaman-an.
Unom niini ang namatay ug 9 na ang naka rekober ug 13 ang aktibo nga kaso apan ang 1 niini ang nag negatibo na ug nakagawas na sa ospital.