TULO ka grupo sa Incident Management Team (IMT) ang mouban sa prosisyon karong adlawa, Huwebes, Enero 9, 2020, aron masiguro nga marespondehan gyud dayon ang mga nagkinahanglan og tabang labi na medikasiyon.
Nasayran nga sa nilabay nga tuig, dunay 15 ka mga indibidwal ang narespondehan atol sa prosisyon, apan sa mga minor lamang nga mga panginahanglanon sama sa pagkalipong, paglisod sa pagginhawa ug uban pa ug walay delekado kaayo.
Gibutyag ni Nick Jabagat, tsirman sa City Disaster Risk Reduction Management Department (CDRRMD), nga lakip kini sa ilang medical plan ug duna'y mag-apil og prosisyon ug bantayan ang mga medyo duna nay pangidaron, kung dunay mabdos ug mga bata.
"Along the route naa gyud ta'y mga gi-assigned dinha pagsugod na og punsisok ana. Naa mi mga tawo nga gi-assign from Urban Search and Rescue (Usar) to monitor," matud ni Jabagat.
Gidugang pa nga dunay tulo ka team mga mouban gyud sa prosisyon.
"Naa tay on patrol aside sa mga naka station naa tay tulo ka teams nga pagsugod sa prosisyon mouban na sila sa panon hangtod na mahuman," dugang pa.
Dunay mga rescue team usab ang makatambay sama sa Carmen Rescue Team sa junction sa dalan sa Fernandez/Velez, Kiosko anaa ang EMS sa Oro Rescue, Yacapin/Velez anaa ang Usar ug rescue medic, Pelaez Sports Center mao ang Bureau of Fire (BFP) Firetruck kauban ang EMS, Capitol grounds mao ang ambulansiya sa Philippine Red Cross ug pag-abot sa Centrio mall anaa ang City Health Office ambulance ug emergency medical team, ug sa Jesus Nazareno Parish ang command post ambulance sa Oro rescue.
Samtang gihangyo ni City Administrator Teodoro Sabuga-a nga katong mga buros, dunay kabilinggan sa panglawas ug mga katigulangan nga di na lang mouban sa prosisyon.
"Katong mga buros di na gyud moapil og baklay, wala'y mga bata, wala'y PWD (person with disabilities), wala'y tiguwang. Mao man na ang importante nga masabtan nga dapat maglikay kay otherwise, maapil ka og katumban, malisig ka diha," matud ni Sabugaa.