UPAT ka mga laboratoryo ang nahuman na og bisita sa World Health Organization (WHO) ug sa Research Institute of Tropical Medicine (RITM) sa Northern Mindanao nga kasamtangang gilihok karon sa Department of Health (DOH) aron hingpit na nga ma-improve ang testing sa mga pasyente kalabot na sa coronavirus disease (Covid-19).
Atol sa daily press briefing niadtong Abril 15, gibutyag ni Dr. Ian Christian Gonzales, Infectious Disease Cluster sa DOH, nga duna na sila'y gihimo aron nga hingpit na nga makwalipikado ang maong upat ka mga laboratoryo.
Dugang pa niini nga tulo ka mga butang ang ilang gabuhaton karong panahona diin una ang pag-ayo sa maong mga pasilidad, pagbansay sa mga staff ug pagpamalit og mga Reverse Transcription (RT-PCR) nga mga makina.
"Ang pag-rennovate sa atong mga laboratory para ma qualify siya sa biosafety level 2. Ikaduha ang pag-train sa atong mga staff in molecular biology and biosecurity as required sa RITM and ikatulo procure sa mga RT-PCR nga machine," matud ni Gonzales.
Gidugang pa niini nga gi-andam usab sa DOH ang "gene expert" machines nga ginagamit sa pag-test sa sakit nga tuberculosis apan karon pwedi usab magamit sa pag-diagnose sa covid-19 rason nga gi-andam usab kini.
Nagpaabot karon ang DOH og ubay-ubay ka mga cartridges nga gidonar sa PBSP ug ADB (Asian Development Bank).
"Naa tay gapaabuton nga 160,000 cartridges courtesy of the PBSP or Philippine Business for Social Progress na group and 25,000 cartridges from ADB so ubay-ubay ang atoang increase sa testing capacity nga mahimo," dugang pa.
Anaa sa 13 ka mga "gene expert machine" ang ania sa rehiyon sa nagkadaiyang dapit nga gitakdang magamit na kung maabot na ang maong mga cartridges.