SA REPORT nga gipagawas ni Dr. Adriano Suba-an, kinsa chairman sa Regional Task Force for Covid-19 sa Northern Mindanao, nga 11 ang kumpirmadong nagpositibo sa coronavirus disease (Covid-19) dinhi sa Northern Mindanao.
Sa Abril 13, 2020 nga report niini, iyang gipahibalo nga sa 11 ka mga nagpositibo sa Covid-19, upat ang nakarekober human nagnegatibo na sa ikaduhang sample sa confirmatory case, tulo niini ang nakabsan sa kinabuhi o namatay, samtang adunay duha na-admit sa balay tambalanan ug laing duha ang gipailawom sa hugot nga home quarantine.
Ang upat karon nga bag-ong nagpositibo sa Covid-19 nga nahibilin mao kining PH3967, usa ka 16 anyos nga babaye nga taga Tubod, Iligan City.
Na-admit kini niadtong Marso 16, 2020 tungod sa sintomas sa sakit sa tilaok, sip-on ug kanunay nga pag-ubo. Aduna kini daan gibati nga ashtma ug napamatud-an sab nga gikan nakabiyahe sa Manila ug na expose sa usa ka positibo didto samtang mitambong sa usa ka panagtigom.
Sunod niini si PH4084, 50 anyos ang pangidaron nga lalaki, taga Valencia City, Bukidnon. Niadtong Marso 25, 2020, nagpakonsulta kini sa Bukidnon Provincial Medical Center tungod sa sintomas nga hilanat ug diarrhea ug adunay kasaysayan nga nibiyahe sa Matina, Davao City kay mitambong sa derby. Gipaubos kini karon sa hugot nga home quarantine.
Ikatulo mao si PH4085, usa ka 69 anyos nga lalaki, taga Tudela, Misamis Occidental. Naadmit kini niadtong Marso 27, 2020 human nagpakonsulta sa usa ka pribado nga clinic niadtong Maros 24, 2020 tungod sa pag-ubo ug paglisod sa ginhawa. Kini adunay travel history sa Cebu City.
Ang ikaupat mao si PH4083, usa ka 18 anyos nga lalaki nga taga Cagayan de Oro City. Kini nga pasyente nagpakonsulta sa Southern Philippines Medical Center sa Davao City niadtong Abril 1, 2020. Nakasinati og sintomas nga pag-ubo ug paglisod sa paginhawa. Aduna sab balatian nga Hodgkin Lymphoma Stage 3, usa ka klase sa kanser sa dugo. Nakabsan sa kinabuhi niadtong Abril 9, 2020 atol sa diagnosis nga acute respiratory distress syndrome ug pediatric community acquired pneumonia-D.
Subling gihangyo ni Suba-an ang katawhan nga kung adunay travel history sa mga lugar nga infected sa Covid=19 ang boluntary gyod dayon nga moreport sa Barangay Health Emergency Response Team.
Sa pagkakaron, gipahibalo sab ni Suba-an nga adunay 75 ka mga health workers ang gipaubos sa facility under quarantine kon diin 40 niini ang na-discharged na.