NEGATIBO sa sakit nga 2019 novel coronavirus o 2019-nCoV ang lima ka mga indibidwal kinsa mga patients under investigation (PUI) sa Northern Mindanao.
Nasayran nga anaa sa walo ka mga PUI ang ihap dinhi sa Northern Mindanao nga kasamtangang anaa ospital samtang giingong lima niini ang gikatakdang makagawas na sa balay tambalanan diin sila gi-obserbahan ug nagnegatibo.
Gibutyag ni Dr. Ian Gonzales, ulo sa Infectious Diseases Cluster sa DOH-Northern Mindanao sa pakighinabi sa SunStar Superbalita, nga lima na ang gitakdang mogawas diin pulos sila negatibo.
“Currently admitted 8, for discharge with negative result 5,” pahayag ni Gonzales.
Gidugang pa usab niini nga wala’y lokal nga transmisyon o pagtakod sa maong virus tungod kay tanang PUI pulos mga langyaw ug dunay overseas Filipino worker.
Nasayran nga hugot ang kampanya sa tinugyanan sa Department of Health kalabot na niining virus ug gani niadtong nilabay nga semana gi-aktibo na ang mga Barangay Health Emergency Response Teams aron mas mapalig-on ang pagbantay sa mga kabarangayan.