BUGNAW nga selda ang katulganan sa 54 anyos nga lalaki human nadakpan dihang gitumbok nga nangmolestiya sa lima ka mga bata mga alas 8:00 sa gabii niadtong Lunes, Enero 6, 2020, sa Bara-as, Barangay Tubod, Iligan City.
Sikop si Eric S. Castillon, 54, minyo, usa ka construction worker ug residente sa Purok 12, Zone-1, Barangay Saray, Iligan City.
Sa imbestigasyon sa Iligan City Police Station 4, nasuta nga ang biktima niining 54 anyos ang lima ka mga bata nga nagpangidaron og 3 anyos ngadto 7 anyos.
Si Police Major Abogado Mautin Jr., ang station commander, niingon nga nadawat sa ilang desk officer kini nga report, hinungdan ilang giadtoan ang lugar.
Naabtan nila nga anaa na sa mga pamilya ang suspetsado.
Giingong si Castillon usa lamang ka bisita ug higala sa apohan sa usa sa biktima.
Nag-inom kini niadtong tungora nga nagsugod mga alas 5:00 sa hapon.
Giingong lango na sa ilimnon nga makahubog ang suspek dihang nahitabo ang insidente.
Ang magsuon nga biktima nisulti sa ilang inahan nga gihatagan sila sa suspek og P20 ug gisabak sila sa suspek ug gimolestiya.
Nakurat pag-ayo ang inahan, hinungdan gikompronta ang suspetsado ug dinhi nadiskubre og usab nga lakip diay sa gimolestiya niini ang laing tulo ka mga bata nga silingan sa unang duha ka biktima.
Ang mga ginikanan sa mga biktima giabisohan nga ipaubos sa medical ug pisikal nga eksaminasyon ang mga bata kon asa usa ka kanila adunay positibo nga resulta nga sekswal nga giabuso.
Ang suspetsado karong panahona ang detinado na sa prisuhan ug laumang patong patong nga kaso ang atubangon niini karon panahona.
Si Police Colonel Pareja, ang city director sa Iligan City Police Office, nanawagan ug nagpahimangno sa mga ginikanan nga bantayan ang ilang mga gagmayng bata labina kining mga babaye ug dili magsalig sa bisan kinsa bisan paman kini paryente, lolo, higala ug uban pa.