USA ka annual convention sa tanang child development workers sa probinsya sa Misamis Oriental ang matigayon karong umaabot Oktubre 30, diha sa De Lara Park, sa hawanan sa Kapitolyo Probinsyal.
Kini ang gikumpirmar ni Provincial Early Childhood Care and Development (PECCD) Office head Maryden Ocot diin iyang gibutyagan nga han-ay na ang tanang gikinahanglan alang sa kalamposan sa maong dakong panagtapok sa mga day care teachers.
Mokabat sa 750 ka delegado ang motambong niini nga okasyon, lakip na ang 725 ka child development workers ug 25 ka municipal og city social welfare and development officers sa 23 ka lungsod ug duha ka dakbayan sa probinsya.
Ang kalihokan langkoban sa usa ka santos nga misa ug parade sa palibot sa kapitolyo.
Highlights sab sa dakong kalihokan mao ang paghatag og award sa mapili nga mga 25 ka mga outstanding child development workers ug ingon man pangpanghatag sa mga plake alang sa mga retirees nga nagsilbi isip child development workers og municipal social welfare and development officers kaniadto.
Gipasabot ni Ocot nga karon lamang nahatagan og pagtagad ang mga child development workers sa probinsya human ang kagamhanan sa probinsya daw pinaagi ni Governor Yevgeny Vincente Emano nga nagbubo og P3.5 milyones nga budget.
Kini alang sa 750 ka day care workers og centers sa tuig 2019 kini pagsiguro nga dili ulahi ang mga kabataan sa Misamis Oriental sa libreng edukasyon nga angay lamang kanila hilabina nga ang edad nga 3 ngadto sa 5 anyos maoy usa ka kritikal nga edad sa kalamboan sa usa ka tawo.