TEMPORARYO nga gidestino sa nagkadaiyang estasiyon sa dakbayan sa Cagayan de Oro ang walo ka mga pulis nga gi-relieve sa city director gikan sa Police Station 2 (PS2) sa Cogon.
Kini human nasapon ni Police Senior Superintendent Nelson Aganon, city director sa Cagayan de Oro City Police Office (Cocpo), ang walo ka mga sakop sa PS2 sa pagsurprisa niini sa pagbisita nga wala diha sa ilang mga pwesto.
Sa pakighinabi sa SunStar SuperBalita ngadto kang Mardy Hortillosa, tigpamaba sa Cocpo, gibtuyag niini nga temporaryo una nga gidestino sa nagkadaiyang estasiyon sa dakbayan ang walo ka mga pulis aron usab nga dili makibhangan ang ihap sa kapolisan ilabi na kay nagsing-abot na ang eleksiyon.
“Kung holding unit sila, ma vacuum sila, dili lang kana siya kay after sa election naa’y plano nga e-assign outside sa Cocpo sila,” ang pahayag ni Hortillosa.
Nasayran nga si Police Officer (PO) 1 Chris Lanzaderas anaa na sa Police Station 6 (PS6) sa Puerto, PO2 Lorgen Ysalina, PO3 Bebelito Casing Jr., PO1 Raymund Daisog, PO1 Ramel Murro ug PO1 Alfie Tagapulot ang anaa sa Police Station 8 (PS8) sa Lumbia ug PO1 Elnes Concha ug PO1 Eldefonso Moralidad Jr. sa Police Station 7 (PS7) sa Bulua.
Nasayran nga daan na nga nagbutyag si Aganon nga posibleng ipagawas ang mga ma-relieved sa mga estasiyon sa gawas mismo sa Cocpo.