LAING walo na usab ka mga repatriate o gipapauli dinhi sa nasud sa Pilipinas nga mga overseas Filipino workers (OFW) ang gi-isolate dinhi sa dakbayan sa Cagayan de Oro.
Kini ang gipahibalo ni Dr. Lorraine Nery, kinsa mao ang Cagayan de Oro City health officer.
"Over the weekend, naa tay mga OFW nga nanguli and they are now in the city isolation unit nga ato giprepare sa ilaha," matud niini.
Gipasabot sab niini nga kini sila nga mga OFW ang gikan sa Cebu City nga gipasilitar sa ahensya sa Overseas Workers Welfare Administration (Owwa) ug gikoordinar sa Humanitarian cluster sa emergency operation center.
Sugod sa Marso 30, 2020 ngadto April 26, 2020, moabot na ngadto sa 249 nga mga OFW niabot dinhi sa dakbayan sa Cagayan de Oro.
Mokabat sa 124 ang natapos na sa ilang 14 ka adlaw nga kwarantinas ug adunay 110 nga on going karon panahona lakip na ang nakadugang nga laing walo ka OFW nga bag-o lang niabot.
Matud ni Dr. Nery nga taliwala nga wala kini sila mga sintomas sa coronavirus disease, nagpabilin gimonitor gihapon ilang mga gibati ug girequired nga tapuson ilang kwarantinas sulod sa isolation unit.