USA ka Authorized Person Outside Residence (Apor), tulo ka mga locally stranded individuals (LSIs) ug upat ka mga returning overseas Filipino workers (ROFs) nga nagpositibo sa coronavirus disease (Covid-19) ang naayo human ang resulta sa ilang swab test migawas nga negatibo Huwebes, Agosto 6, 2020.
Ang kinatibuk-ang ihap sa mga Covid-19 patients nga naka-recover sa Cagayan de Oro ana na sa 113.
Lakip sa walo nga mga recovered Covid-19 patients mao ang 44-anyos nga lalaki nga Apor gikan sa usa ka gated community sa Barangay Lumbia nga nagnegatibo sa iyang ikaduhang swab.
Ang uban nga mga recovered nga pasyente mao ang:
- Usa ka 57-anyos nga lalake nga LSI gikan sa Taguig City ug residente sa Barangay Bonbon;
- Usa ka 46-anyos nga lalaki nga ROF gikan sa Europe ug residente sa Barangay Iponan;
- Usa ka 46-anyos nga lalaki nga LSI gikan sa Cabuyao, Laguna ug residente sa Barangay Tablon;
- Usa ka 38-anyos nga lalaki nga LSI gikan sa Makati ug residente sa Camp Evangelista, Barangay Patag;
- Usa ka 43-anyos nga lalaki nga ROF gikan sa Middle East ug residente sa Barangay San Simon;
- Usa ka 38-anyos nga lalaki nga ROF gikan sa Middle East ug residente sa Barangay Bugo; ug
- Usa ka 35-anyos nga lalaki nga ROF gikan sa Middle East ug residente sa Barangay Tablon.
Matud ni Acting City Health Officer Dr. Lorraine Nery nga ang Covid-19 recovery rate sa Cagayan de Oro padayon nga misaka human ang mga recoveries naa na sa 65 porsyento.