MIGAWAS ang nagkadaiyang reaksyon sa unang pamahayag ni Misamis Oriental Governor Bambi Emano niadtong niaging semana nga dako iyang posibilidad nga magpapili pagka mayor sa siyudad sa Cagayan de Oro.
Duha ka higayon nga gisulti niining daghan siya gikonsidera nga sanguan lakip na niini sila si Pompee La Viña ug Second District Representative Klarex Uy.
"Depende sa political ally kay naa man si Mayor Pompee ug Congressman Klarex ug naay mga kapitan nga nagpabiling loyal sa Cagayan de Oro but that with part of the discussion in two years from now," mao kini tipik sa pahayag ni Emano.
Tungod sa pagkalambigit sa pangalan ni Uy, miguwa ang espekulasyon sa dakong posibilidad nga pag-alyansa nila ni Emano.
Mihatag reaksyon si Klarex Uy kalabot niini nga gipabati sa iyang programa sa usa ka sibyaan sa radyo.
"Mahitungod sa alliance sa pagkakaron nga panahon, pagserbisyo pag-alagad usa sa katawhan dili ako makasulti kung mahitungod kay wala pami nagkatagbo sa akong mga kauban wala pa nako gidala sa ila ang mahitungod sa pikas partido. Wala pa pod ko kadungog kon unsa ilang tagsa-tagsa ka mga opinyon ug huna-huna ako silang tahuron ug respetuhon kay dili akoa ang plano ug tingog ang akong gusto lang sundon kay dili ka magmalampuson kung dili malig-on imong mga partido ug grupo ug dili nimo hatagan ug kahigayonan ang tagsa ka opinyon," matud ni Uy.
Gipasalamatan sab niini ang kaikag ni Emano nga nagplanong moserbisyo sa dakbayan sa Cagayan de Oro tungod kay matag usa ka pulitiko adunay katungod ug tinguha nga moserbisyo ug moalagad.
"Malipay ko nga naa silay gugma nga moserbisyo ug moalagad sa katawhan kay sa akong kasinatian nga higayon nga nag-alagad ko sa katawhan labina sa pagtabang sulbad sa mga problema kinahanglan sa katawhan dili tiaw ug dili sayon ang pagtabang ug sulbad sa problema sa katawhan kay nagkalain-lain ang katuyoan, lain-laing ang hangyo, lain-laing ang pangayo bisan unsa," matud niini ug miingon nga taliwala sa pagtabang pulos hiuon pagsaway ug batikos ang madungog imbes nga magpasalamat.
Gipasalamatan niini ang kaikag ni Emano nga magpapili pagka mayor ug aminado kini nga iyang higala si Emano sa 14th Congress.
"Pasalamat ko ni Governor Bambi sa iyang tinguha nga magpapili ug tinguha sa pagkakamayor. Number one iya kining katungod ug iya kining gugma ug panglantaw nga sa iyang kaugalingon nga modagan siya pagka mayor. Aduna siya dako nga panglantaw nga makadugang sa pag-ugmad ug uswag sa atong dakbayan," butyag niini, kinsa midugang nga iyang gitahod kini ug girespetuhan nga desisyon.
"Ako kanang gitahod ug girespetaran ang iyang tinguha. Salamat pod ko nga sa among panag-amigo ug panag-uban sa 14th Congress, ingon ana gihapon iyang gipadayon iyang gugma sa pagserbisyo sa katawhan nga human sa pagserbisyo sa lalawigan, gusto niya ipadayon ang maong pagserbisyo aron mapaambit matagamtaman ang maong serbisyo sa lalawigan nga madala niya dinhi sa atong dakbayan," matud ni Uy.