KASAMTANGANG anaa sa mini-cell sa Police Station 2 sa Cogon ang usa ka amahan human giingong mi-hostage sa iyang pamilya niadtong Dominggo sa gabii, Abril 14, sa Sitio Lomboy, Indahag, siyudad sa Cagayan de Oro.
Ang maong amahan nigamit og botelya pag-hostage sa iyang pamilya sulod sa ilang balay.
Sa nahipos nga impormasiyon gikabutyag nga subay sa silingan nga kalit nga naglasong si Brandon kinsa bag-o pang mata niadtong tungora sa dihang nakita ang asawa ug silingan nga usa gihapon ka babayi nga nag-estorya.
Giingong kalit kining nasuko ug dihang nitubag ang asawa gipasulod kini sa balay ug wala na gipagawas.
Gituohan nga nagselos ang bana tungod kay wala siya’y trabaho ug ang asawa lang nga usa ka maestra ang dunay panginabuhi hinungdan nga kanunay kini aburido.
Atol sa pagpang-hostage giingong usa ka barangay tanod ang nakapagawas sa amahan ug gidala kini sa kapulisan.
Wala na nagpagawas og pamahayag ang amahan ug niingon nga hulaton una niya nga moduaw ang iyang asawa sa prisohan.