KASAULOGAN sa Bag-ong Tuig, napatay sa kaugalingon nga amahan ang iyang anak, mga alas 6 sa buntag sa Purok B Mahayag Dangcagan, Bukidnon.
Giila ang biktima nga mao si Greag P. Pamat, 36, minyo, residente sa susamang dapit. Gitumbok nga suspetsado ang amahan nga giilang si Patricio, 64.
Sa imbestigasyon sa Dangcagan Police Station, nasuta nga kining amahan gibahad-baharan na daan sa iyang anak niadtong gabii sa Disyembre 31, 2019 hinungdan nga didto kini natulog sa iyang anak nga babaye.
Pag-uli niini sa buntag sa Enero 1, 2020 sa ilang puloy-anan, gitabo siya sa anak ug gitigbas hinungdan sa pagkaigo sa iyang kamot apan nadepensahan niini iyang kaugalingon ug nakuha ang hunting knife nga giluba sa dughan sa anak hinungdan sa kamatayon niini.
Giingong adunay personal nga bangi ang duha nga misangpot sa niini nga insidente.
Kasong parricide atubangon sa amahan karon panahona kinsa boluntaryong mitahan sa buhatan sa kapolisan.