BUN-OG ang usa ka asawa sa pagpangulata sa kabit sa iyang bana human gikompronta sa pagpanulong niini niadtong Abril 19 sa Barangay Patag, sa Cagayan de Oro.
Nireklamo sa Police Station 4 sa Carmen si Sheena (dili tinuod nga ngalan), 40, minyo, residente sa maong dapit batok kang Maria, 36, dalaga nga taga Bukidnon.
Ang bana ni Sheena nga usa ka sundalo nadestino sa probinsiya sa Bukidnon.
Sumala sa alegasyon ni Sheena nga gibira-bira ni Maria ang iyang buhok, gisipa ug gikawras ang nawong hinungdan sa mga bun-og nga naangkon.
Giguba pa sa giingong kabit ang mahalon nga cellphone ni Sheena.
Nahitabo ang pagpangulata dihang nanulong ang kabit sa balay sa ugangan ni Sheena diin usab kini nagpuyo.
Gidugang pa sa asawa nga nasayod usab kini nga nagbaton og anak ang iyang bana ug kabit gani nag-edad na kini og 5 anyos.
Ang maong insidente ang nakatala na sa nahisgutang buhatan sa kapulisan ug giduso na sa Barangay Lupon alang sa tukmang aksiyon ug disposasiyon.