PADAYON and pag-ubos sa ihap sa mga bag-ong kaso sa Cagayan de Oro human ang dakbayan nakatala og 29 ka mga kaso, usa niini returning overseas Filipino worker (ROF) ug 28 ang mga local transmissions.
Sa 28 ka mga bag-ong lokal nga kaso, 13 ang local index nga mga kaso; siyam ang local cases with link; upat ang lokal nga authorized person outside residence (Apor); usa ang Apor with link; ug usa ang patay.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 19,128.
"Happy kay ko ani nga maayo nga numbers. Congratulations sa katawhan sa dakbayan sa Cagayan de Oro," matud ni City Mayor Oscar Moreno.
"Yes, we can do it and let's continue doing it para we will decisively overcome the virus," dugang niini.
Ang Cagayan de Oro adunay 3,761 ka mga aktibo nga kaso, 886 niini na-admit sa Northern Mindanao Medical Center ug uban pang mga ospital sa syudad, 2,859 ang outpatients, ug 16 ang mga ROFs/LSIs.
Nakatala usab og 108 ka mga Covid-positive nga mga kaso nga karon naka-recover. Anaa na karon sa 14,549 ang ihap sa mga nakarekober nga mga kaso sa dakbayan.
Ang ihap sa mga namatay sa Covid-19 sa syudad anaa na sa 818.