NAGPALABAN sa kapolisan ang magtiayon human wala gipasakay sa motorela tungod kay baho og tiil ang bana sa dan Rizal-Gaerlan sa dakbayan sa Cagayan de Oro, niadtong adlawng Dominggo, Nobiyembre 25 mga alas 8:30 sa gabii.
Nidangop sa Police Station 1 sa Divisoria ang magtiayon nga residente sa Zayas, Carmen, dakbayan sa Cagayan de Oro, human gibalibaran sa dispatser sa pagsakay sa motorela.
Giingong na-insulto ug susamang nakasinati og diskriminasiyon ang magtiayon ug giingong nayatakan ang ilang tawhanong katungod.
Wala gipasakay sa dispatser ang magtiayon tungod nireklamo sab ang mga pasahero ug drayber sa motorela sa pagpanimaho sa tiil sa bana nga gituohang adunay samad tungod kay giputos man kini sa panapton.
Aduna sab pagkadagkuon sa lawas ang magtiayon.
Dali kining gi-aksyonan sa kapolisan ug gitambagan ang drayber ug dispatser nga dili angayang mamili og pasahero.
Nagkasinabot ra sab ang duha ka parte hinungdan nga gihimo kini silang prayoridad ug gihatod ra sa ilang panimalay.
Ang insidente nakatala na sa buhatan sa kapolisan ug giduso sa tinugyanan sa Road and Traffic Administration alang sa tukmang disposasyon ilabi na nga gidili man ang pagpamili ug pagbalibad sa mga pasahero. (KCS)