HUGOT nga gipanawagan sa lokal nga kagamhanan sa Siyudad sa Cagayan de Oro ang mga nagbuhi og baboy nga dili pakan-on og lamaw o pasaw ang mga baboy.
Kini aron nga malikayan ang African Swine Fever (ASF) nga nakaapekto sa pipila ka mga dapit sa Luzon.
Sigon ni Dr. Lucien Anthony Acac, city veterinarian, nga magtinabangay lang aron nga dili makasulod ang ASF virus sa siyudad.
“Nakita naman gyud sa mga eksperto nga gikan sa abroad ug gikan sa atong lugar nga mao man nay source of infection, so sayod naman ta,” matud ni Acac.
Gidugang pa niini nga dili kini makatakod sa tawo ug gani luwas ang siyudad sa ASF. Sa pagkakaron wala naapektuhan ang siyudad tungod kay mas daghan pa gihapon ang mangaon og karneng baboy.
"Sa atong ka-igsuonan nga mga namuhi og baboy, ayaw lang gyud ninyo pakan-a og pasaw, lamaw basic ra kaayo man kaayo na sa tanan simple things to follow," matud pa ni Acac.
Niadtong Septiyembre 27 gimugna ang Executive Order 172 o temporary total ban sa mga buhing baboy ug pork products nga gikan sa Luzon.