GISUTA pa sa Bureau of Fire Protection (BFP) ang alegasiyon nga butane ang hinungdan sa pag-ulbo sa kalayo nga nilamoy sa mga 20 ka balay niadtong Pebrero 2 mga alas 7:02 sa gabii sa Zone 1 Manggaha, Upper Sto. Niño, Barangay Bayabas, siyudad sa Cagayan de Oro.
Subay sa BFP, anaa sa P1.8 milyones ang damyos sa sunog nga niabot sa third alarm ug mga alas 7:59 sa gabii kontrolado na ang kalayo.
Anaa sa mga 20 ka balay ang gilamoy sa kalayo ug anaa sa mga 143 ka indibidwal ang apektado.
Subay sa impormasiyon nga giingong dunay alegasiyon nga butane nga nabiyaan ang tinubdan sa sunog nga daling nikaylap sa mga kasikbit nga panimalay.
Nagpahimangno usab si Eddie Abrogar, kapitan sa Barangay Bayabas, nga magmatngon ug likayan na ang paggamit sa butane.
"Kadtong gagamit sa butane, kung mahimo ayaw namo paggamit og butane kay mao na usa sab sa cause sa sunog," matud ni Abrogar.
Samtang wala pa usab gikumpirma sa BFP ang nahisgutang alegasiyon nga kini ang hinungdan sa sunog apan daan na nga nagpahimangno ang BFP nga dili angayang gamiton ang butane sulod sa panimalay tungod kay desinyo lamang kini alang sa gawas o sama sa camping labi na kung ang igo lang usab nagpa-refill diin hugot kinin nga ginadili.
Kasamtangang nagpasilong ang mga biktima sa kapilya sa Barangay Bayabas.