Cadac: Isyu sa druga dili ipamolitika

GIHANGYO sa chairman sa City Anti-Drug Abuse Council (Cadac) nga si Kagawas Romy Calizo nga dili unta gamiton sa pagpangampanya ug pamolitika ang isyu sa druga ilabi na sa mga nalambigit nga mga barangay nga nalakip sa top 5 nga seryusong apektado sa ilegal nga druga.

Matod ni Calizo nga unta sabton sa katawhan ug unta dili gamiton sa pagpangampanya ibali sa pagpanaot sa kaatbang sa politika ang isyu sa druga sama sa nahitabo sa Barangay Carmen.

“In Carmen alone grabe gyud so that should not take advantage as issue in campaigning kay Cadac is exerting effort, in fact ang Carmen lang ang nakaduha na og sa CBRP (Community-Based Rehabilitation Program) program nga enrollment kay dako man gud siya,” pahayag ni Kagawad Calizo.

Gidugang pa niini nga nagkinahanglan gayud og insaktong panahon ug pagkugi aron nga malimpyohan ang tibuok Carmen gumikan na usab sa kadaku-on niini.

“We have to understand that Carmen, because una mao’y pinakadako so in clearing Carmen it takes a lot of effort,” dugang pa niini.

Gipasigarbo usab ni Calizo nga bisan pa man nga aduna pa gihapo’y mga problema sa druga apan karong panahona aduna na’y kalamboan itandi kaniadto.

“Despite that nakita baya nato pud ang transformation sa Cagayan de Oro,dili sila basta-basta na bitaw nga open lang, di ingon kaniadto nga murag gabaligya ra og sigarilyo,wala’y gabadlong, wa’y kahadlokan,” dugang pa ni Calizo.

Nasayran nga usa ang Barangay Carmen nga nalakip sa top 5 nga seriously affected barangays sa dakbayan sa hisgutanan nga may kalambigitan sa illegal nga druga lakip na usab ang Barangay 23, Bonbon, Bugo ug Lumbia.