OPISYAL na nga magtiayon ang napulo ka paresan nga nakapabenepisyo sa mass wedding niadtong Marso 23 sa St. Augustine Cathedral, dakbayan sa Cagayan de Oro.
Kini programa sa City Anti-Drug Abuse Council (Cadac) diin parte kini sa Community Based Rehabilitation Program sa matag barangay aron usab nga mapalig-on ang magtiayon ug pamilya lakip na usab sa simbahan.
Matud ni Teodoro Sabuga-a Jr., city administrator, nga buot usab sa lokal nga kagamhanan sa dakbayan ug sa Simbahan nga dili lamang nga mapailalom sa rehabilitasiyon ang mga nalambigit sa druga apan mapalig-on usab ang ilang pamilya.
“Dili lang hisgutanan nga ma-rehabilitate sila sa drug addiction but gusto sad nato nga ma-strengtehen ang family ties sa mga magtiayon,” matud ni Sabuga-a.
Gidugang pa niini nga daghan ang nangandoy nga makasal ug pinaagi niini nga programa nahatagan sila sa kahigayonan.
“Tungod sa mga problema nga kawad-on, problema nga galisod ang proseso at least ang ilang damgo natuman gihapon ug kining tanan mas gipasalamatan namo ang drug responders nga ni-agwanta gyud, ni gradute sila,” dugang niini.
Mapasalamaton usab ang magti-ayon nga sila si Demuel ug Mayene Santaan, ang usa sa mga nakabenepisyo nga nakasal na gyud sila human sa dul-an unom ka tuig nga panag-ipon.
Nasayran nga karon lang nga bulan sa Marso ning gradwar sa rehabilitasiyon nga programa si Demuel ug nanghinaot ang asawa nga mamahimo na silang seryoso sa ilang pagpamuyo.
Nanghinaot usab si Sabuga-a nga unta mamahimo kining simbanan sa tanan nga mga drug responders ug sa mga kabataan.
“And we are hoping nga mahimo kining kapanaminan, mahimo kining inspirasiyon pud sa atoang ubang drug responders labi na kabataan nga diay naa pa gihapoy paglaom,” dugang niini.
Nasayran nga libre kini tanan sama sa wedding ring, pagproseso sa mga dokumento ug uban pa gawas lamang sa ilang wedding gown ug sa barong.
Gipahigayon usab ang reception sa kasal sa Duaw park nga gitambongan usab mismo ni Mayor Oscar Moreno.