LAKIP ang City Hall sa siyudad sa Cagayan de Oro sa 50 ka establisimento nga wala makapasar sa Clean Water Act labi na niining wastewater treatment facility.
Gibutyag ni Engr. Armen Cuenca, ulo sa City Local Environment and Natural Resources Office (Clenro), lakip usab ang city hospital, merkado ug uban pa.
"Kini mga almost 50 ang wala nipasar, gamay lang kaayo naa ra siguro sa one percent, wala'y facilities," matud ni Cuenca.
Samtang ang mga malls dinhi sa siyudad ang giingong pasado sa Clean Water Act.
"Ang wala kining establishments, hotels, restaurants ug hospitals, naay mga hospitals nga wala," dugang pa.
Gibutyag ni Cuenca nga hugot na nga ipatuman sa Environment Management Bureau (EBM) ang Clean Water Act labi na ang pagbaton niini nga pasilidad.
Giingong kinahanglan na nga ang mga patigayon magbaton niini tungod usa na kini sa rekisitos diha sa pagkuha og business permit.
"Ang order raba kung wala na nga facilities walay business permit, mao na ang uban moingon nga manira nalang mi, wala mi mahimo kung manira mo kay mao may balaod," matud ni Cuenca.
Gipasabot usab niini kung unsa ka importante ang nahisgutang pasilidad tungod kay alang kini sa kinaiyahan.
"Aron nga ang ilang ma-discharge lage dili makadugang og pollute sa atong mga suba, dagat mao nga required gyud sa ila ang to have a wastewater treatment facility," dugang pa.
Nasayran nga atol sa wastewater treatment technology forum niadtong Marso 10 sa Mallberry suites dunay duha ka kampanya nga nagpresentar sa ilang technology o bag-ong kagamitan nga teknolohiya kalabot na niini aron matabangan ang mga patigayon nga makabaton na niini.