ANAA na sa dul-an 100 porsento ang natapos sa composite team sa gipahigayon nga clearing operation sa bulan sa Disyembre tuig 2019.
Anaa sa 52 kilometros ang angayang malimpyo sa composite team sa national highway ilabi na Butuan-Cagayan-Iligan Road (BCIR) o sa dalan nga Iponan paingon sa Bugo ug Puerto paingon sa Alae sa Sayre Highway.
Gibutyag ni Antonio Resma Jr., focal person sa composite team, nga totally cleared na gyud kining porsento nga nalimpyo diin naguba na ang mga tindahan ug uban pa nga angayang gubaon.
“Sa atong assessment, naa nata sa 48 something kilometers so kana siya naa sa 94.91 porsyento. Kana is cleared na gyud, wala nay building. Naguba na nila ilang mga tindahan. Totally cleared na gyud,” matud ni Resma.
Giingong duna pay nahabilin sama sa usa ka perimeter fence sa usa ka dakong planta ug patigayon nga dako pa ang trabahuon, apan kamulo na kini og trabaho.
Nagpasalamat usab kini nga nituman ang mga naapektohang mga patigayon ug uban pa atol sa gipahigayong clearing operation.
“Maayo man, cooperative man atong katawhan sa dakbayan,” dugang pa.
Magpadayon usab sila karong bulan sa Enero tuig 2020 diin sugdan na ang mga secondary national road.