ALERTO ug hugot nga magbantay ang mga personahe sa City Local Environment and Natural Resources Office (Clenro) karong umaabot nga Bag-ong Tuig, Enero 1, 2020.
Mapasalamaton ang Clenro sa pagpangulo ni engineer Armen Cuenca gumikan kay nikunhod ang mga basura human sa kasaulogan sa Pasko, diin usa niini ang pagdili sa pagpabuto diin kaniadto magpasak lang ang basura tungod sa mga firecrackers ug uban pa.
Sa pakighinabi kang Cuenca, giingong ilang tan-awon ang mga magkatag og basura, ilabi na nga mas daghan ang magpabuto panahon sa pagsugat sa Bag-ong Tuig.
“Karong New Year, tan-awon nato basig diha na sila mo-arte,” matud ni Cuenca.
Nanawagan usab kini nga mamahimong responsable sa kalimpyo sa siyudad ilabi na sa paglabay sa basura sa insaktong labayanan.
“Ako lang is, responsable unta ta nga citizen sa atong dakbayan kay ang kalimpyo ug kahugaw sa dakbayan mo-reflect dili sa opisyal kundili apil sa mga residente no. So, mao nga dapat magmatngon ta atong i-dispose og tarong ang atong mga basura,” dugang pa.
Giingong makadayeg ang mga bisita panahon nga makaanhi sa dakbayan ug makitang limypo ang siyudad.