GIBUTYAG sa City Local Environment and Natural Resources (Clenro) nga ang Bolonsori Cemetery alang sa mga patay human dunay mga reklamo paglubong sa mga namatay tungod sa coronavirus disease (COVID-19) sa maong sementeryo sa Barangay Camaman-an, siyudad sa Cagayan de Oro.
Gibutyag ni Engr. Armen Cuenca, sa Clenro ug management of the dead cluster, nga duna'y mga reklamo sa mga nanimuyo sa maong dapit tungod sa kabalaka sa Covid-19.
"Actually, mao na ang ilang reklamo nga nagkuyaw daw ang ilang kinabuhi kay naa daw diha gilubong ang Covid nga mga biktima," matud ni Cuenca.
Subay pa niini nga ang maong sementeryo alang gyud sa mga patay ug ang sagad nanimuyo sa maong dapit duna'y mga pinuy-anan apan diha lang nagpuyo aron nga mag-negosyo.
"Ang Bolonsori alang na sa mga patay, di na para sa buhi, so mao na kung nagtan-aw ka sa kadaot sa imong panglawas, na hinay-hinay na og balhin sa imong pinuy-anan kay naa man kay balay. Diha lang gyud ka nagpuyo kay gusto ka maka-negosyo ka sulod sa menteryo," matud ni Cuenca.
Gi-aghat usab niini ang mga nanimuyo sa maong lugar nga mobalik na lang sa ilang mga orihinal nga mga pinuy-anan.
"So balik sa imong balay kay kanang menteryo para na sa patay, so alangan man og asa namo dalhon ang patay?" dugang niini.
Nasayran nga mga anaa sa 300 ka mga pamilya ang nanimuyo sulod sa Bolonsori nga sementeryo nga posibleng mapapahawa gumikan na usab sa rehabilitasyon sa maong lugar diin gitakdang bag-uhon ug himuon nga City Memorial Park.