GI-AGHAT sa City Local and Environment Resources Office (Clenro) ang katawhan nga suportahan ang ilang kampanya nga “no to plastic” human nakita nga kini ang daghan og ihap diha sa mga gipanglabay nga basura.
Gibutyag ni Engr. Armen Cuenca, tisrman sa Clenro nga kadaghanan sa ilang nakuha nga mga basura gikan sa creek mao ang napundo nga mga plastik nga botelya maayo na lang kay wala kini nakalahos sa kadagatan.
Kahinumduman nga pito ka mga dump truck sa basura ang nahipos sa mga sakop sa Hapsay Sapa ug Clenro sulod sa duha ka mga adlaw nga pagpanglimpyo sa creek ning siyudad. Sa unang adlaw anaa sa unom ka mga dumptruck nga dunay gidak-on nga 6 cubic ang nahipos nga basura ug niadtong Enero 14 usa ka dumptruck nga dunay gidak-on nga 20 cubic ang nalikom nga basura.
Sa pakighinabi sa Sun.Star Superbalita kang Engr. Armen Cuenca, tisrman sa Clenro nga gipahigayon ang maong operasiyon sa pagpangulo ni Patrick Gabutina sa Hapsay Sapa ug inabagan sa ilang buhatan gumikan sa grabeng basura sa creek.
Giingon napundo ang basura human nakasinati og ulan nga hinay ang siyudad apan niabot og buntag ang maong ulan niadtong niaging adlaw.
"Sa first day unom ka dump truck, 6 cubic man siguro ang kataposan usa ra pero 20 cubic nalimpyo na, two (2) days nga nilimpyohay unya hugaw-hugawan na pud," matud ni Cuenca.
Gibutyag ni Cuenca nga dili pasabot nga ang mga residente lamang duol sa maong creek ang naglabay sa basura apan kini lakip na sa mga naglabay sa bisan asa nga dapit dinhi sa dakbayan.
"Naa pa gyud kay sa naabot pa lang to didto unya mag ulan napud, mao ang atong kampanya nga ang plastic cellophane dili na gyud pwede karong adlaw mag-penalty na gyud ta," dugang pa.
Naghangyo usab kini sa katawhan nga magtinabangay pinaagi sa dili na paglabay og basura sa bisan asa nga dapit ug likayan na ang pagpamalit og tubig nga anaa sa plastik nga botelya ug uban pa.