ADUNAY tambag ang PaDayon Pilipino founder ug kanhi mayor sa Cagayan de Oro nga si Vicente “Dongkoy” Emano niining sunod-sunod ang pagpamomba nga nahitabo sa pipila ka mga dakbayan sa pulo sa Mindanao diin ulahing nahitabo sa General Santos City ug Cotabato City.
Tambag sa kanhi gobernador sa lalawigan nga angayan lang gyod magbinantayon ang katawhan bisan paman og wala o adunay pagpanghulga sa palibot.
“Bantay lang gyud. Hangyo sa ko sa katawhan magtinabangay kita,” matud niini sa interbyu sa mga prensa.
Kahinumduman nga si Emano naila nga usa ka peace maker ug motungas bisan asang lugar aron makig peace talk tali walhong grupo ug terorista.
Gani niadtong niaging bulan gitudlo kini sa iyang anak nga si Governor Bambi Emano nga maoy mangulo sa local peace panel tungod sa panglantaw niini nga magmalinawon ang pulo lakip ang lalawigan tungod kay ang mga hulga sa terorismo ug mga pagpamomba sa kasikbit nga dapit dako kaayo og epekto sa turismo nga maoy gitukhan niini sa walo ka haligi sa iyang pagpanerbisyo.