GIBUTYAG sa grupo sa Gabriela nga aduna’y kasuko si Presidente Rodrigo Duterte sa mga kababayen-an hinungdan sa mga giluwatan niini nga mga pahayag batok sa mga babaye.
Atol sa International Women’s Day, nagpahigayon og One Billion Rising dance ang grupo sa kababayen-an ilabi na ang Gabriela diin usa sa padayong panawagan niini mao ang respeto sa mga kababayen-an ug lakip na ang paghatag og kagawasan sa nasikop nga si Myles Albasin.
Sa pakighinabi sa SunStar SuperBalita kang Amalin Baroma, tigpamaba sa Gabriela-NMR, gibutyag niini nga padayon ang ilang panawagan nga respetuhon ang katungod sa kababayen-an ilabi na sa Administrasiyon Duterte.
Gidugang pa niini nga daghan ang ilang mga demanda nga wala hatagi og pagtagad ilabi na ang mga saad usab ni Duterte sa panahon sa iyang kampanya.
Nabalaka
Nabalaka usab ang grupo sa kahimtang ni Myles Albasin, 21, kinsa ni gradwar sa University of the Philippines-Cebu ug lumad nga taga Cagayan de Oro human nga nasikop sa government forces niadtong Sabado, Marso 3, sa giingong encounter sa Negros Oriental.
Gipamugos sa grupo nga wala’y nahitabong encounter batok sa giingong government forces ug tali sa grupo ni Albasin ug planted matud pa ang maong mga nakuha gikan kanila.
Gidugang pa nga bisan sa mga nahitabo gi-aghat niini si Albasin nga padayon lang sa pagtabang ug kung unsa matud pa ang gitoohan niini nga katungod sa katawhan.