HUGOT ang kampanya sa Regulatory and Complaint Board (RCB) nga wagtangon ang “extra service” sa mga spa hinungdan nga nagpahigayon og inspeksiyon niadtong Miyerkules, Enero 30, sa Divisoria, dakbayan sa Cagayan de Oro.
Upat ka mga spa ang gisusi sa RCB uban sa National Bureau of Investigation (NBI), Cagayan de Oro Health and Wellness Association Inc. (CdeO Hawai), ug gibutangan kini og “This Establishment does NOT ALLOW any EXTRA SERVICE.”
Gibutyag ni Atty. Edgardo 'Egay’ Uy, tsirman sa RCB, nga hugot gayud ang ilang kampanya nga wala-on na ang mga “extra service” ilabi na usab nga duna'y mga nadawatang mga taho kalabot na niini.
“Dili pangitaon ang 'extra service’ kay ang kampanya sa RCB ug sa city government wala-on na gyud ni siya, daghan ang dili gusto ani nga kampanya pero unsaon ta man nga prostitution man na, ilegal man na kini siya,” matud ni Uy.
Gidugang pa niini nga bisan pa man kung managhinigugmaay ang maghimo niini apan kung sa spa kini pagabuhaton pabilin kini nga ilegal kay ginahimo sa pampublikong dapit.
“Gawas kung dunay relationship pero dili sad maayo nga diha buhaton kay public place man ni available man ni sa public, whatever nga sexual act nga mahitabo dinhi, done in a public place, illegal gihapon,” dugang ni Uy.
Samtang gibutyag usab ni Tanya Gustilo, Founding President sa Cagayan de Oro Hawai, nga tumong gayud niini nga mabalik ang dignidad sa industriya sa mga spa.
“Ang amo gyud is to promote the integrity of the spa industry, to restore the dignity of the massage industry,” matud ni Gustilo. (KCS)