NAGPAHIGAYON og fogging ug misting ang tinugyanan sa Department of Health (DOH)-Northern Mindanao niadtong Agusto 6 atol na usab sa gihimong 4-o’clock habit sa Sitio Macanhan, Barangay Carmen, Cagayan de Oro.
Nasayran nga ang mismong elementarya nga tunghaan gipahigayon ang fogging ug misting, ug nagbutang usab sila og mga kurtina nga olynet diin mamatay ang lamok kung makatugpa niini.
Gideklara na sa kaulohan ang dengue epidemic niadtong Agusto 6 hinungdan nga kinahanglan nga mas palapdan pa ang kahibalo sa mga residente, ug gani kinahanglan nga batasanon na ang pagpanghinlo matag adlaw sa alas 4 sa hapon o bisan kausa lang sa usa ka semana.
Gibutyag ni Dr. Adriano Suba-an, OIC-director sa DOH-Northern Mindanao, nga tumong niini nga mahatag ang insaktong impormasiyon.
“Ihatag ang tamang information bisan bata pud para madala pud nila ang information sa ilang mga silingan, sa ilang ginikanan, sa ilang mga igsoon actually. Increase the level of awareness nga ang dengue makapatay nga dili nato pwedi nga pasagdan lang kay delekado ang dengue,” matud ni Suba-an.
Gidugang pa nga naghatag na usab kini og direktiba sa tanan nga unahon ang kampanya sa pakigbatok sa dengue.
“I had already given an instruction to all of them that the priority really will be the campaign against dengue they will be organizing. Mag-organisa pud sila kung asa sila na assigned for this sabaysabay na 4-o’clock habit,” dugang pa.
Usa ang Sitio Macanhan sa Carmen ang gi-una tungod kay kini ang dunay pinakadaghang natalang kaso nga nataptan sa dengue virus.