PABILING gitambalan sa ospital ang usa ka 25 anyos nga lalaki human gipusil niadtong Disyembre 26, mga alas 10:25 sa gabii sa Municipal Plaza, P-5, North Poblacion, Maramag, Bukidnon.
Giila ang biktima nga mao si Jerwin O. Cañete, 25, taga P-1, Base Camp, Maramag, Bukidnon.
Sa inisyal nga imbestigasyon sa Maramag Police Station, nasuta nga kining biktima sakay sa iyang bag-ong palit nga XRM 125 nga motorsiklo kolor pula ug paingon sa plaza sa munisipyo.
Apan, samtang gi-parking kini sa plaza, tulo ka wala mailang mga lalaki ang pwersadong nikuha sa iyang motorsiklo.
Iya kining gisuklan pinaagi sa pakigsumbagay kanila, apan ang usa sa suspek diay armado og pistola ug gipusil kini hinungdan sa pagkaigo sa iyang likod nga bahin.
Milampos ang mga suspetsado sa pagdala sa iyang motorsiklo samtang ang biktima daling gidala sa Bukidnon Provincial Hospital ug padayon pa nga giobserbahan sa mga doktor karon panahona.
Giila na usab sa kapulisan kinsa ang mga responsable karong panahona.