NANAWAGAN ang Parish Pastoral Council for Responsible Voting (PPCRV) ug Archdiocese sa Cagayan de Oro sa hapsay nga piniliay karong umaabot nga Barangay ug Sangguniang Kabataan Elections sa Mayo 14 ning tuig.
Si Archbishop Raul Dael kinsa nagsilbing chairman sa PPCRV sa siyudad sa Cagayan de Oro, nihangyo sa katawhan nga tabangan sila nga maangkon ang hapsay nga piniliay.
Gibutyag niini nga ang labing importante niining piniliay mao ang gipili sa katawhan ug dili kadtong namalit lamang sa boto.
"Ang among gipaningkamotan nga ang eleksyon magmalinawon, hapsay, ug matinud-anon ug maayo ang resulta kay dili man ta maka expect og damgo ug usa ka bag-o nga katilingban kon atong gipili dili gyod mao ang gipili sa katawhan," matud ni Bishop Dael.
Gibutyag sab niini nga unta ang mga kandidato dili manikas sa piliay.
"Akong panawagan para sa atong tanan nga mga kandidato nga modagan para sa barangay elections nga unta huptan nato ang usa ka maayo nga pagpangalagad nga modaog kita dili tungod kay nandaya kita ug modaog kita tungod kay gipili kita sa katawhan," pasabot pa niini.
"Kon gipili kita sa katawhan aduna kitay katakos, aduna kitay otoridad sa pag-alagad kanila," dugang pa ni Bishop Dael.