BUOT ni Konsehal Teodulfo Bong Lao nga mapangitaan og pundo ang paghatag og “hazard pay” ngadto sa mga sakop sa Roads and Traffic Administration (RTA) labi na nga risgo ang ilang trabaho.
Kini human nga duna nay duha ka mga traffic enforcer ang gipatay dinhi sa dakbayan diin pinakaulahing biktima mao si Mark Langam.
Gibutyag ni Lao nga gawas nga hulgaon, biay-biayon pa ang mga sakop sa RTA kinsa gapaulan ug gapainit aron lang mahapsay ang dagan sa trapiko sa dakbayan.
Ingon buot usab nga ma-regular na ang estado niini alang usab sa ilang mga benepisyo nga madawat.
“Kinahanglan i-regular sila, permanent employee sa city government unya unsay mga benefits nga ilang madawat kinahanglan nga ihatag sa ila akip na gani hazard pay atong pangitaan og budget,” matud ni Lao.
Gibutyag pa ni Lao nga looy ang mga sakop sa RTA kinsa dugay na nga nagserbisyo apan nagpabilin nga casual pa hangtod karong mga panahona.
“Casual bisag job order nga mga traffic enforcer or mga RTA personnel kay imagine ang uban diha mga five years, ten years naa pay twelve years diha casual lang gihapon unya tan awon nimo ilang trabaho risgo kaayo,” dugang pa.
Giingong dili lamang basehan sa paghimo nga regular sa mga empleyado sa RTA ang gidugayon sa pagpanerbisyo apan sa mga bag-o pa nga makitang matinud-anon, kugihan ug responsable.