BOLUNTARYONG mitahan ang usa ka pulis bitbit ang iyang lisensya human nakabangga og 11 anyos nga bata mga alas 12:45 sa hapon niadtong adlaw’ng Lunes, Nobiyembre 18, sa P-5, Barangay Lunao, Gingoog City.
Nakabsan sa kinabuhi si Jay Are Luzano, Grade 5 student sa Lunao Elementary School, residente sa Riverside, susamang dapit.
Ang nakabangga kinsa mitahan mga alas 6 sa gabii giilang si Police Staff Sergeant Jerry Rañada Gentillan, 44, minyo, taga Zone 2, Barangay Bayabas, dakbayan sa Cagayan De Oro.
Si Gentillan kasamtangan nga sakop sa Philippine National Police ug nadestino Provincial Highway Patrol Team sa Misamis Oriental.
Sa inisyal nga imbestigasyon sa kapulisan sa Gingoog City Police, nasuta nga padulong si Gentillas sa national highway gikan sa weste paingon sa este.
Apan pagdangat sa taliwala nga bahin sa St. Mary Academy ug Lunao Elementary School, kalit nga mitabok sa highway si Luzano gikan sa norte paingon sa south direction kay mobalik na sa tunghaan.
Giingong giaplay sa pulis ang brake sa iyang Kawasaki nga motorsiklo, apan wala na naapas.
Gitabangan pa niini ang biktima pagdala sa Lipunan Hospital aron masalbar ang kinabuhi, apan tungod sa bun-og nakabsan sa kinabuhi sulod sa balay tambalanan.
Detinado sa police station ang pulis ug gi-impound sa kapulisan ang motorsiklo niini.