HONESTY o kamatinud-anon ang konsepto sa tindahan nga gi-launch sa tinugyanan sa Regional Training Center (RTC)-Northern Mindanao alang sa Leupapo Inc. niadtong Enero 18 diha sa mismong buhatan sa RTC, Patag, sa siyudad sa Cagayan de Oro.
Nasayran nga kini ibilin lang nga walay makabantay ug sa buot mopalit nga mga staff ug recruit sa Philippine National Police (PNP), ibilin lang usab ang bayad.
Kini nga proyekto mismong gimugna ug gipanghingusgan sa RTC director nga si Police Colonel Edison Revita tungod na usab sa dakong kasing-kasing diha sa pagtabang sa mga bata nga naghambing og sakit labi na leukemia nga kasamtangang anaa sa Leupapo Inc. diin ang founder mao si Reczel Clarabal.
"Honesty, walang magbabantay. Kukunin mo yung pagkain dun magbabayad ka so mga supplier namin dito is mga Leupapo, parents ng mga bata ng Leupapo, one way na makatulong financial kami sa kanila," matud ni Revita.
Ang mga mopalit usab niini mao ang mga kapulisan nga anaa sa RTC, lakip na ang mga new recruits. Samtang suportado usab kini sa mga recruits.
"Dakong tabang kay isa pud ko nga naay pamilya nga nagkasakit og cancer. For me, as police officer, kung naa lang gyud mi ikatabang, amo gyud tabangan," matud ni Patrolwoman Hazel Mae Coles.
Samtang nag-aghat usab si Patrolwoman Glamour Soque, bag-ong recruit kinsa dunay igsoon nga naghambing niini nga balatian ug gani namatay kini sa nag-edad og 10 anyos, nga tabangan ang mga bata nga anaa sa Leupapo tungod kay dili lalim ang kahimtang sa mismong dunay balatian nga susama niini lakip na sa mga pamilya.
"Hinaot motabang mo sa Leupapo kay dili sayon nga naay pamilya nga naay sakit nga leukemia dili lang ang gasto pero sakit siya nga lanatawon nga nagsuffer," dugang ni Soque.
Alang usab sa laing bag-ong recruit nga mas makatigom usab sila kay anaa ra sa sulod ug healthy pa gyud nga makatabang sa ilang panglawas.
"Dako kaayo kay gawas nga makatabang mi sa ilaha dili na mi mogawas pud mga prutas pud ilang baligya, mas maka save," matud usab ni Patrolman Arman Corales.