LAB-AS pa sa panumduman sa Kagay-anon labina sa mga survivor sa Bagyong Sendong nga mihapak sa dakbayan sa Cagayan de Oro niadtong tuig 2011, takdo walo ka tuig na ang nakalabay karong Martes, Disyembre 17.
Gibutyag ni Vilma Bagas, 45, taga Canitoan, nga dili niya malimtan ang maong hitabo apan swerte pa gihapon siya kay kumpleto ang iyang pamilya tungod sa sanga sa mangga nga maoy nakaluwas kanila.
Giingong kusog nga hangin ang unang nabatian ug pag-abot sa eskwelahan taga liog na ug pulos atop nalang ang makita. Gikabutyag nga upat pa ka bulan human sa pagpanganak sa dihang nahitabo ang maong trahedya.
“Naghawid mi sa mangga kay naa mi sa punoan sa lubi. Nag-abay ang lubi ug manga. Ingon akong bana mang di na gyud nato ni kaya. Gipahawid ko niya sa lubi,” matud ni Bagas.
Gidugang pa nga mas maayo nalang nga wala sab kini biyae sa iyang bana.
“May gani akong bana naa ra, wala ko niya biyae. Hapit ko ato malumos kauban sa akong bana. Sanga sa mangga akong nahawiran. Di naman gyud namo makaya ang tubig. May gani akong anak akong una napadala sa covered court. Four months siya ato,” matud ni Bagas.
Naguol usab kini sa dihang mahinumdoman nga daghan ang mga nangayo og tabang nga wala nila usab matabangi kay lage lakip sila ang hapit na usab mangaanod.
“Daghan nagsinggit og tabang. Ang uban wala gyud namo matabangi kay giluwas pud namo among mga kaugalingon og pamilya. Dili gyud lalim ang naagian namo. Pasalamat nalang gyud mi sa Ginoo nga safe mi tanan,” dugang niini.
Samtang gibutyag usab ni Mayor Oscar Moreno nga dili malikayan ang kasakit nga dala sa maong trahedya tungod kay daghan ang mga nangahanaw ug wala pa nakita ug uban pa.
“Naa’y mga butang sa kinabuhi nga magkahitabo for reasons. Naay mga butang sa kinabuhi nga dili nato gusto nga sakit kaayo pero naay leksyon niana,” matud ni Moreno.