GIBUTYAG sa tinugyanan sa Public Employment Services Office (Peso) nga posibleng dunay koneksiyon sa Department of Foreign Affairs (DFA) ang ilegal nga pagpang-recruit kini human sa nasikop nga usa ka babaye sa gipahigayon nga entrapment operation sa kapulisan sa dakbayan sa Cagayan de Oro.
Matud ni Kathleen Kate Sorilla, Peso manager, nga sila sa Peso maglisod sa pagsulod sa buhatan sa DFA apan ang mga ilegal nga nagpahigayon og transaksiyon mas dali pa nga makasulod.
“Immediately makasulod silag DFA, kami gale dili mi kasulod mao ng palag kaayo ko, dali ra kaayo sila makasulod, naay kapit sila sa sulod,” matud ni Sorilla.
Gidugang pa niini nga buot gayud sa ilang buhatan nga mamahimong illegal recruitment-free ang dakbayan sa Cagayan de Oro gumikan kay kung unsa ang mahitabo sa mga biktima sa illegal recruitment, igo na lamang sila mokuha sa airport.
“Simbakog patay naba sila or nanga-unsa,” dugang niini.
Giingong usa sa mga sinyales nga ilegal ang pagpang recruit mao ang ipahigayon ang interview sa kan-anan, fastfood chain ug walay identipikasiyon sama na lamang sa Special Recruitment Authority nga pirmado sa Philippine Overseas Employment Administration.
Usa ka Maricel Jorigue, 34, taga Barangay Lanise, Claveria, Misamis Oriental ang nasikop sa kapulisan human gireklamo sa unom ka mga tawo nga giingong iyang nabiktima.