NANGHINAOT ang kadagkoan sa Simbahang Katoliko ilabi na sa panahon sa advento nga makapaluyo ang katawhan sa pangandoy nga kalinaw sa Mindanao.
Gibutyag ni Archbishop Antonio Ledesma sa Metropolitan Archdiocese of Cagayan de Oro nga karon ang panahon sa pag-abot sa Ginoo ug panahon usab sa pagpangandam sa kaugalingon sulod sa mga kasing-kasing.
"Ang panahon sa advento mao ang panahon karon sa pag abot sa atong Ginoo sa Pasko sa pagkatawo niya. Usa ka nindot nga panahon aron kita makaandam sa atong kaugalingon sulod sa atong kasing-kasing sa pagdawat sa pag-abot man sa atong manluluwas sa atong kalibutan," matud ni Ledesma.
Gidugang pa nga angayang magkig-uban diha kay Maria ug Jose sa pagpangandam sa pag-abot sa Ginoo dinhi sa kalibutan.
"Busa makihiusa, kita kay Maria ug kang Jose sa ilang pag-andam sa pag-abot sa atong Ginoo ug hinaot unta nga kani man ang panahon diin kita makapaluyo sa maong pangandoy gayud sa kalinaw dinhi sa Mindanao," dugang niini.
Karong Lunes, Disyembre 16, mao na ang pagsugod sa Misa de Gallo.