KALUWASAN sa katawhan sa lalawigan ang gipaniguro sa buhatan sa Provincial Risk Reduction Management Department (PDRRMD) matud sa head niini nga si Jun Dy.
Gibutyag niini nga dili mominos 200 na kapin ka mga tunghaan ug pipila ka mga daycare centers ang gipaubos nila og earthquake drills.
Hangyo ni Dy nga unta magmakalmahon ug magbinantayon lamang panahon sa linog.
Gipaabot niini nga kung aduna man gani namatikdan nga pagliki sa dingding sa panimalay, i-report kini sa matag munisipyo aron ang buhatan sa Building Official ang magpahigayon dayon og pakisusi niini.
Ang mga safety officer sa mga tunghaan lakip sa ilang gipahimangnoan kung unsay buhaton panahon sa linog ug itawag dayon kini sa mga rescue teams ug mga enforcers.
Matud ni Dy nga ang mga susama niini nga kalamidad ang dili matagna apan kinahanglan magbinantayon.
Dili kalimtan nga panahon sa linog magmakalmahon ug presence of mind kanunay.
Ikober ang kamot sa ulo ug kung adunay mga butang sama sa lamesa nga mahimong matagoan didto magkapot sa tiil aron kon inkaso madat-ogan sa nangahulog dili maapektohan.
Gipaabot sab niini nga labaw sa tanan, mag-ampo nga wala nay pagtay-og nga mahitabo.
"Ang solusyon gyud niini nga ampo gyud ta sa labawng makagagahom nga kanang the big one dili gyud na mahitabo ug kanang sige-sige nga linog," matud ni Dy.
Dugang niini nga ang PDRRMD mohatag sa pagtulun-an aron masiguro ang kulawasan sa mga tunghaan sa lalawigan human iyang nakita diha sa social media nga dili tiaw ang nahitabo sa Daig Elementary School didto sa Tulunan, North Cotabato kung asa duol lang ang epicenter sa 6.6 magnitude nga linog niadtong adlawng Martes.
"Ang pagpangandam atong ihatag, mga pagtulun-an nga atong gi impart ug gi-share sa atong magtutungha nga naa kami pirme kanunay nga ilang ga ipraktis. Every time we leave the school, the premises, we always make it a point nga unta ang mga safety officer pirme ipraktis with or without the emergencies for the kids' safety. Ug mahimong habit nga sama ra sila namahaw, naniudto ug nanihapon nga kabalo na sila sa ilang buhaton panahon sa linog," matud ni Dy.